پکتيا ورزشکارانو سره نږدې دوه سوه زره افغانۍ مرسته وشوه
راپور: فرید احمد تسکین / پکتیا
۱۳۹۲/۱/۲۱ وری
هغه غونډه چې په همدې اړوند د پکتيا په ورزشي لوبغالي کې جوړه شوې وه پکې لس ګونو تنو ورزشکارانو،قومي مشرانو،ولايتي چارواکواو د مدني ټولنو استازو ګډون کړی و.
دغه مرستې چې د پکتيا ملي سوداګر لخوا د نږدې دوه سوه زره افغانيو په ارزښت د پکتيا ورزش کارانو سره وشوې پکې د ورزش اړوند توکي شامل وو.
د پکتيا ولايت ملي المپيک امر امين الله علم يار د دغه ملي سوداګر د مننې ترڅنګ د ده کړنې په ستاينليک وستايلې.
علم يار رسنيو ته وويل:(( دغه ورزشي توکي چې نږدې د دوه سوه زره افغانيو په ارزښت برابر شوي و د پکتيا ملي سوداګر انجينر تاج محمد لخوا د پکتيا د بېلا بېلو ولسواليو ورزشکارانو ته وويشل شول.
د پکتيا ولايت ملي سوداګر انجينر تاج محمد ګرديزی چې د همدې غونډې په ترڅ کې يې خبرې کولې وويل: (( د پکتيا ورزشکاران چې د هيواد او نړۍ په کچه يې خپل هيواد ته برياوې راوړي دي تر دې دمه کوم چا نه دې هڅولي او نه هم ورته د دولت لخوا څنګه چې لازم دی کوم کار شوی دی. زه ترخپله وسه هڅه کوم چې د پکتيا ورزشکارانو سره نورې مرستې هم وکړم ترڅو ورزشکاران وستايل شي او خپل هيوادته د پخوا په شان برياوې راوړي.))
نوموړی د پکتيا ولايت له مرستيال والي مننه وکړه چې دی یې ورزشکارانو سره مرستې ته هڅولی دی او د هر ډول مرستو ژمنه يې ورسره کړې ده .
دده په اند نور ملي سوداګرو هم بايد ورته مرستې د ورزش د ودې لپاره وکړي او پرې نږدي چې نوي ځوانان نيشه يې توکو ته مخه وکړي.
دغه ملي سوداګر ورزشکاران دسولې سفيران وبلل او له دوی يې غوښتنه وکړه چې د خپل هيواد د برياوو او ګټو لپاره خپلو کې سره د يووالي لاسونه ورکړي.
د پکتيا ولايت مرستيال والي عبدالولي سهي د دغه ملي سوداګر مرستې د ستاينو وړ وبللې او ژمنه يې وکړه چې د پکتيا د ورزشکارانو ستونزې به د لوړ پوړو چارواکو تر غوږونو ورسوي او ملي سوداګر به وهڅوي چې د ورزش د ودې لپاره هر ډول مرستې ونه سپموي.
د پکتيا ولايتي شورا مرستيال ډاکتر الله مير ځاځي له ياد ملي سوداګر او همدارنګه له نورو ورته سوداګرو غوښتنه وکړه چې خپلې مرستې نورې هم وغځوي او د پکتيا ورزش کاران وهڅوي ترڅو له نيشه يې توکو سره مخه ښه وکړي.
نوموړي له نړيوالې ټولنې غوښتنه وکړه چې خپلې پانګې په پکتيا کې په کار واچوي او له هيڅ ډول ستونزو سره به مخ نه شي.
نوموړي په ځينو کړيو نيوکه وکړه چې د پکتيا د امنيت په ګډ وډولو کې لاس وهنه کوي.
نوموړي زياته کړه:(( پکتيا اوس مهال امن لرونکی ولايت دی ورزش کاران يې په څو کلونو کې ښه ځليدلي دي او د دې ښکارندويي کوي چې پکتيا د سولې ټاټوبی دی .))
د پکتيا ولايت يو تن ورزشکار زمری کامران د دغه ملي سوداګر د مننې ترڅنګ د افغانستان د ملي المپيک پر رياست نيوکه کوي : ((دغه مرستې یوازې د ملي سوداګر لخوا د پکتيا ورزش کارانو سره شوي د افغانستان ملي المپيک کميټه تل په خپلو دندو کې پاتې راغلې او هيڅ ګټه يې د پکتيا ورزشکارانو ته نه ده رسېدلې.))
مدني فعال او د پکتيا کور مشر محمد رفيع هميم دغه مرستې پرځای وبللې او غوښتنه يې وکړه چې دغه لړۍ نوره هم وغځوي او دغه مرستې دوامداره وساتي.
نوموړي له ټولو ملي سوداګرو او مرستندويه ادارو غوښتنه وکړه چې خپلې مرستې لکه د نورو ولایتونو په شان پکتيا ته هم وغځوي.
د يادولو ده چې ياد سوداګر د پکتيا ولايت مرکز ګرديز او يو شمير ولسواليو کې هم د زده کوونکولپاره ژمني کورسونه برابر کړي وو.
