هغه سره ما د رسنیو له لارې لږ څه مخکې پېژندل. د هغه د ژباړې دوه کتابونه، د پیریانو جګړه او د بنګله دیش بې ستري خورا مشهور دي. په نورو لیکنو کې يي هم ژبه خوږه، روانه او اسانه وه. په تېرو دوو کلونو کې مې دوه ځلې په لندن کې ولید. لومړی ځل مې د ډیورنډکرښې ضد جرګې په یو کنفرانس کې ولید او دوهم ځل مې په شخصي ناسته کې چې زما له راتلو په لندن کې خبرشوی و، دده د یوه دوست د غریبۍ په جونګړه کې ولیدل. دواړه وار، خو په تېره بیا په دوهم ځل لیدنه کې مو د هیواد د حالاتو په اړه له نږدې، اوږدې خبرې وکړي. دی څونه چې په لیکنو کې د پښتنو خواخوږی، ژمن، ځیرک او پوه لیکوال او ژورنالیست و، له هغې زیات په مخامخ خبرو کې مودب، مهربان، ریښتین، دروند او سپيڅلی شخصیت و. ده د احمدشا بابا په نوم د یوې ټولنې مشرتوب هم پر غاړه درلود او په دې اړه يي د خپلو فعالیتونو ترڅنګ د پښتنو د راتلونکې په اړه لوی ملي ارمانونه او پلانونه درلودل.
 دی له دې ډېر ځوریده چې ولې لراوبر پښتانه له بده مرغه پر یوې چرګۍ نه دې راټول . دوی ولې کلتوري ، ژبني ، اقتصادي ، پوځي او اداري واحد مرکز نه لري او د داسې مرکز د جوړیدا لپاره موږ څه باید وکړو؟
 د ارواښاد زرملوال ټوله اندیښنه، د فکر توښه او د عملي کار هره شېبه د پورته هیلو او ارمانونو سره تړلې وه.
 دی که یو خوا د خپلو اثارو او لوړ فرهنګي او علمي شخصیت په برکت تل د پښتنو په منځ کې ژوندی پايي، همدارنګه د خپلو دوستانو او ملګرو منځ کې هم د ریښتیني انسان پتوګه تلپاتې خاطرې لري.
 مړینه يي لويي افغاني ټولنې ته ستره ضایعه بولم. کورنۍ، اولادونو او دوستانو ته يي جمیل صبر غواړم.
 له لوی څښتنه جنتونه ورته غواړم !
اروادې ښاده وي !

انا لله وانا اليه راجعون

په خواشينۍ سره له بي بي سي او نورو خپرنيو څخه خبر شوم چې خدای بښلی زرملوال هم د ورپېښې ناروغۍ له امله خپل پور اداء کړ.
زه د هغه له ليکنو څخه خورا ډېر متأثر وم او له ليکنو څخه يې د هېواد پرستۍ او له وطن سره ژوره مينه له ورايه جوتېده. د پيريانو جګړې او د بنګله دېش د بې سترۍ په نوم کتابونه خورا ډېر په زړه پورې اثار او ډېر ترخه حقايق بيانوي.
زه د زرملوال صاحب له ليکنو هلته زيات متأثر شوم چې زموږ د اسلامي امارت يو نوموتی چارواکی مولوي صاحب متوکل ورسره دلته په لندن کې ليده کاته کړي وو چې د نوموړي کور ته راغلی وو او يو پاکستاني پوځي کمانډر مېجر رشيد هم ورسره وو او خدای بښلي زرملوال ته يې د هغه د ښه سړيتوب او د افغان جهاد سره د مينې تاييد کړی وو چې نوموړی ډېر ښه سړی دی او زموږ له جهاد سره دومره مينه لري چې ان په پوځ کې يې خپله وظيفه پرېښووله او له موږ سره يوځای شوی او دلته انګليستان ته د مولوي صاحب سره چې په هغه وخت کې د افغانستان د اسلامي امارت د بهرنيو چارو وزير هم وو له نوموړي سره د دومره افغانانو باوجود په داخل او بهر کې بل هېڅوک نه پيدا کېده چې نوموړي له ځان سره هغه هم په يوه ديپلوماتيک وضعيت کې له ځان سره مل کړی وو. په ليدنه کې يې زرملوال صاحب ته د هغه د ښه سړيتوب خورا ډېر تعريف کړی وو. زه باور لرم چې زرملوال صاحب به زموږ محترم مولوي صاحب د خپل ملي واسلامي او هم د افغاني رسالت له مخې په غوږ وهلی او پوه کړی وي.
زموږ مولوي صاحب ته دې الله تعالی انصاف روزي کړي چې هغه دومره نه شي درک کولای چې ولې يو پاکستانی پوځي چې هغه بيا په پوځ کې خپله وظيفه پرېږدي او د افغانستان په جهاد کې له دوی سره ونډه او هغه هم بيا په بهرنيو سفرونو کې هغه هم بيا انګليستان غوندې يو ملک ته اخلي. له هماغه وخته د خدای بښلي ليکنې خورا ډېرې خوښېدې او خوښيږي مې.
الله تعالی دې صمد حامد او زرملوال دواړه وبښي. بې له شکه هغه څوک چې له هېواد سره مينه لري، نو الله تعالی به يې د نبوي ارشاد په رڼا کې چې ((حب الوطن من الايمان)) وبښي. زه د دواړو له کورنيو سره په دغه دروند غم کې ځان شريک بولم او دواړو ته له لوی څښتن تعالی څخه د جنت الفردوس او د اعلی مراتبو غوښتونکی يم. الله تعالی دې دواړه وبښي او اروا يې ښادې.

په درنښت
سيدحسين پاچا

په ډېرې خواشينې سره مو خبر ترلاسه کړ، چې د هېواد پياوړی ليکوال او د لوی افغانستان داعي، چې د لوی افغانستان رايوځای کېدل يې لوی ارمان و، په دې برخه کې يې ډېرې هلې ځلې هم کړي دي (استاد غلام محمد زرملوال) تېره شپه د لندن په ښار کې په حق ورسید.
 د (نن ځوانانو غورځنګ) ټول غړي، د استاد له کورنۍ او دوستانو سره په دې غم کې ځان شريک بولي. استاد ته د لوی خدای له درباره د فردوس جنت او کورنۍ ته يې د جميل صبر غوښتنه کوي.
 د (نن ځوانانو غورځنګ) به د استاد فکر او لاره تعقيبوي او د لوی افغانستان لپاره به خپلو هلو ځلو ته دوام ورکوي.
 د (نن ځوانانو غورځنګ) د استاد مړينه د هېواد او ټول پښتون ولس لپاره يوه لويه ضایعه بولي.
 د يادونې ده، چې د (نن ځوانانو غورځنګ) به په دې نږدې راتلونکي کې د استاد زرملوال په ژوند او مبارزه يوه غونډه هم ولري.
 په درنښت

د خواشینۍ پیغام
په ډیرې خواشینۍ سره مې خبر ترلاسه کړ د هیواد تکړه لیکوال ، سیاستوال ، مورخ اوملي مبارز غلام محمد زرملوال له دې نړۍ څخه سترګې پټې کړي .
 انالله وانا الیه راجعون
خدای بښلی زرملوال دملي سنګر یو تن مبارز پاتې شوی او په دې لاره کې یې نه ستړې کیدونکې هلې ځلې کړي .
 زه دده مړینه د هیواد لپاره یوه ستره ضایعه ګڼم ، خدای بښلي ته د فردوس جنت غوښتنه کوم او کورنۍ او هم سنګرانو ته د جمیل صبر غوښتنه کوم .

دافغان ملت ګوند مشر

 

د اوښتون کلتوري ټولنې د خواشينۍ پيغام

خواشيني يو چې وتلی مورخ غلام محمد زرملوال له دې پاتې مېنې وکوچېد.
انالله وانااليه راجعون ط

د هيواد وتلی مورخ، شنونکی، ليکوال او ژورناليست غلام محمد زرملوال په لندن کې د ورپېښې ناروغۍ له کبله په حق ورسېد.
ارواښاد زرملوال د افغانستان په اړه د سياسي، اجتماعي او اقتصادي بصيرت درلودو تر څنګ يو ژمن تاريخ ليکوونکی، ژورناليست او منلی مبصر و چې د ژوند تر وروستيو شېبو يې قلم ژوندی وساته.
نوموړي د ژوند په اوږدو کې په زړه پورې اثار وژباړل او وليکل او د دې تر څنګ يې د افغانستان د اوس او تېر سياسي، تاريخي، کلتوري او جګړه ايز وضعيت په اړه په رسنيو کې په زړه پورې ليکنې او تبصرې خپرې کړې.
ارواښاد زرملوال د هيواد د کم شمېرو ليکوالانو په کتار کې راځي چې قلم يې په باوري ډول د موثقو اسنادو له مخې کارولی او له هغو ليکوالانو يې لار بېله ساتلې چې په تاريخ يې خلک بې باوره کړل.
افغانستان تر وروستي افغانه، احمدشاه بابا، ارګ يا مرګ او ځينې نور يې هغه تاليفات دي چې تر ډېره به افغان ليکوالان د ماخذ په توګه ترې ګټه اخلي.
نوموړي د پېريانو جګړې، د بنګله دېش بې ستري او ځينې نورې ليکنې پښتو کړې دي چې د تاريخ لوستونکو لپاره په زړه پورې او ګټورې دي.
د اوښتون کلتوري ټولنې غړي، د ارواښاد غلام محمد زرملوال په مړينه خواشيني دي او له ټولو علمپالو هيوادوالو سره په دې غم کې ځانونه شريک ګڼي.
په ګور يې نور
اروا يې ښاده او ياد يې تلپاتې

 دنښتر ویبلاګ اداره له درنو خواخوږو لیکوالو ملګرو همدا راز د ټول افغان،تل افغان، روهي،دعوت،تاند،لراوبر، بېنوا،پکتیکا،آزادافغانستان،نعیمي،سپرغۍاو نورودرنو افغان ویبپاڼوچلوونکوڅخه دزړه له تله مننه کوي چې زموږ دګران، قدرمن اوقدردان استادغلام محمدزرملوال  په درناوي کې یې برخه اخیستې ده

محمدامین بسمل