غزل

 له ‌ډېرو پټ دی خو یو تا ته مې مالوم لیکلی
ما مې د خپل ارمان په پاڼه کې ستا نوم لیکلی

ژوند اندېښنه د خپل راتلونکي ، ژوند د مرګ انتظار
چا په  غلط ټکو  د ښکلي ژوند مفهوم لیکلی

ما ورته خط کې جار ، قربان ، خیرات ،صدقه ليکلې
دې راته خط کې  ، مرګ ، بلا، زهر ، زقوم لیکلی

هاغه ظالم ، په مجبورۍ ، د عدالت پاڼو کې
هغه  د خپل ظلم اقرار هم په مظلوم لیکلی

ته له مزاجه یې عاجزه خو په زړه کاپره
دا لکه داسې چې په کاڼي وي چا  موم لیکلی

رستمه وېش چې د نصیب کیدو نو هغه وخت یې
رستمه! ته یې له خوښيو نه محروم لیکلی
            فضل الربي رستم