ربه
كاشكې ماشوم وى خدايه
د دې غمو نه لرې
په هيڅ هم نه پوهيدى
دا پوهيدا كيدى شي
زما د مرګ د لامل شي
ځكه چې!
اوس مې ډير ډير ځوروي
د چا خالونه او د چا يادونه
اختر دى لرې يم له كلي خدايه
نه هم جامې لرم نه سره لاسونه
بس په دا زړه كې مې يو ټك شي ربه
د چا يادونه مې كوږ ووږ كړي لكه مار چيچلى
خو بس يوازې ځان ته ډاډ وركوم
چې بل اختر هم شته دى و به شي نو
خو زما ګمان دى زما د خيال كښتى
ساحل ته نوره تللى نه شي
طوفان يې بيايي كوم يو بل لوري ته
اى نازنينې بس د خداى په خاطر
راته دعاوې د وصال كوه ته ډيرې ډيرې
خداى مهربان دى چې قبولې شي دا ستا دعاوې
دا ستا وصال ته مې زړه ډير ډير كيږي
خو د وصال په طمعه، طمعه مې زړه داسې شين شو
چې تل ماشوم غوندې ژړيږم قرايږمه نه
ربه نور نه شمه زغملاى زه دا
ربه وصال غواړمه
ربه وصال غواړمه
