د2010 م کال دجنوري په 25 م ماسپښين دعراق په تکريت کې ګورکيندونکو مزدورانو ديوه قبر له کيندلو وروسته په ګرمو اسويلو خپل تڼاکې لاسونه تبل.په دې يې ډېر سر نه خوږاوه چې ددوی په لاس جوړ شوي قبر ته چې کوم مړی راوړل کيږي په هغه به نن ماښام څه تيريږي .بلکه په دې فکر کې ډوب وو چې ددوی دمزدوري به څه کيږي او په قبر به دمرمرو کار څوک او څنګه کوي .دغه مړی چې څو شيبې وروسته ددوی تر پښو لاندي خاورو ته سپارل کيده ،کوم يوعادي عراقی مړی نه و بلکه يو داسي مړی وو چې ټول ژوند يې له دغو کم نصيبو خلکو ليرې په قصرونو کې تير کړی و .په داسي قصرونو کې چې ګور کيندونکو مزدورانو په خوب کې هم نه وو ليدلي .ټول عمر يې امرونه چلولي وو.دسترګو په رپ کې يې هر هغه خواهش پوره شوی و چې نور عراقيان ديوه يوه دپوره کيدو په هيله دمور له غيږې دګور تر غيږې کړيدل . دامړی علي حسن المجيد و چې په علي کيمياوي مشهور و .علي کيمياوي دعراق اوسني حکومت اعدام کړ او يوځلي هم نه بلکه عراق محکمې يې دڅلور ځله اعدامولو امر صادر کړ .دمحکمې په څرنګوالي او دعراق داوسني حکومت په حيثيت سل او زر خبرې کيدای شي خو يوه خبره چې هيڅ يو دعقل خاوند يې يې نشي ردولای داده چې انسان هسي بې ځايه کبرجن شی دي .دپنځو ورځو محدود واک يې په ټپو ړوند کړي .ډېرو خلکو ته به ياد وي چې کله دکيميکل علي په امر په کردانو زهرجن کيميکل وورول شول ، نو دکردانو کوڅې له پړسيدلو مړو ډکې وې .دتي ماشومان دخپلو مړو ميندو په سينو پوري سريښ له ژوند نه بې برخي کړل شو ل .انځورونه يې واخستل شول او په ټوله نړۍ کې تت کړل شول .په ليدو به يې داحساس دخاوندانو زړه خولې ته راته .سړی نه پوهيږي ددې انځورونو په ليدو به پخپله جنرال علي حسن المجيد څه احساس کاوه .ايا دبل هر جابر واکمن په توګه به يې دځان لپاره دبرائت دليلونه لټول ،داظلم به يې دنورو ګناه او يوازي دمسئوليت ترسره کول بلل ،او که به يې دخپل هيواد او دهغه دګټو لاس ته راوړنه بلله .پر عراق دامريکايانو او دهغو دانډيوالانو بې شرمانه يرغل او بيا دارته دختو په وخت دصدام حسين ميړانې دهغه دګناهونو پلونه پټ کړل او دډېرو په زړو کې دهغه لپاره يوڅه ځای پيدا شو ،خو له علي کيميکل نه داهم ونه شوه ،بلکه دمحکمې په بهير کې دهغه ځوړندسر داثابته کړه چې (دتومتونو پرې باران دي +جانان له شرمه سترګې نه پورته کوينه ) صدام کلونه کلونه په عراق حکم وچلاوه او جنرال علي حسن المجيد دهغه ښی لاس بلل کيده .دواک پرمهال دواړو څه وکړل ، او يا له برمه له لوېدو وروسته له دواړو سره ددوی ځاې ناستو او امريکايانو څه وکړل ،او يا هم دا چې دصدام حسين او دعلی حسن المجيد دچارمارۍ کولو پرمهال په هغه کوټه کې دټوکې ټکالې کونکو، او فلم اخستونکو برخه ليک به څه وي داخو ددې دنيا ګئ ناخوالې دي ، چې نن يې يو زورور کوي سبا يې بل .خو دحکم چلولو ليونۍ مينه او فرعوني تکبر په انسانانو څه کانې کوي دا به هربل ظالم او جنرال علي حسن المجيد ته په هغه ورځ معلومه شي چې د ستراو عادل واکمن له خوا دحلبجه دمسلمانو کردانو لوڼې چې دځنکندن په سختو شيبو کې يې هم دسرونو وېښتان په رنګينو دسمالو تړلي وو او خپل سترونه يې مات نه کړل ،او دده سپاهيانو په خاورينو کوڅو کې په مرداربويه زهروووژلې وپوښتل شي چې (بی ای ذنب قتلت )