ناپوهه چې کېوتي دي له ما سره په جنګ
کېوتي دي د ميندو له دوعا سره په جنګ

دا ولي وي زموږه په دې خاوره هر سړی
له غرونو له سيندونو او هوا سره په جنګ 

ډېر خلک د غليم پر ځای اخته دي دلته اوس
د خپلو تقاضاوو له بلا سره په جنګ

له سترګو د تمييز د تښتولو په غرض
څوک اچوي هندارې او رڼا سره په جنګ؟

ها مخامخ خو هسې هم د سر قاتل ګڼي
دا دوه چې سره ناست دي خوا تر خوا سره په جنګ

ملګريو په مردارو اوبو نه کېږي اودس
په خدای که مو کيسه کړله صفا سره په جنګ