د امريکا ولس مشر بوش به په خپل ژوند کې ډېرې داسې پېښې ليدلي وي ، چې هغه يې په ياد پاتې شوي وي خو د منتظر الزيدي لخوا په بوټانو ويشتل داسې پېښه وه ، چې بش به يې تر خپله ژوند پورې په ياد ساتي او پس له مرګه به يې د هغه ورثه او اولاده هم ياد ساتي . د بي بي سي لخوا په يوه راپور کې ويل شوي دي ، چې په ټوله نړۍ کې چې له هر چا څخه پوښتنه وکړې نو په دې پېښه خوشحاله او خبريال ته دوعا ګانې کوي؛ ځکه هغه کار ، چې بمونو ، الوتکو او نورو درنو وسلو ونه کړى شو، دوو بوټانو په ډېر لږ وخت کې وکړى شو . خو يو شمېر خبريالان بيا په دې پېښه خفه دي او وايي ، چې نوموړي خبريال نورو خبريالانو ته ځکه ستونزې را ولاړې کړې ، چې له دې وروسته به خبريالان خبري غونډو ته له بوټانو سره نشي تلى او د قلم ، کاغذ او کيمرې څخه پرته د نورو شيانو د وړلو اجازه به نه ورکول کېږي. بلخوا په خپله بش چې کله نيويارک ته ورسېد نو خبريالانو ته يې وويل ،چې په بوټانو له ويشتلو څخه دا نتيجه بايد وانخستل شي ، چې په عراق کې د امريکا مخالفين زيات دي . (سره ددې ، چې يو زيات شمېر عربان د امريکا دبهرنيو چارو وزيرې کنډوليزا رائس ته د نوموړې د نوم پرځاى کندارا وايي ، چې مطلب يې د بوټانو مزي دى) بش يوځل بيا دا پېښه په مسخرو واړوله او زياته يې کړه ، چې ښه و د هغه د بوټانو د ويشتلو له لامله د خبريالانو له سختو پوښتنو خلاص شوم. نوموړي زياته کړه ، چې زما په دې اتو کالو کې تر اوسه ډېرې وېروونکې پېښې رامنځ ته شوي دي خو د بوټانو ويشتلو پېښه تر ټولو وېروونکې وه ، هغه دا منطق وړاندې کړ ، چې د يو کس لخوا په بوټانو ويشتل د ټول ملت نمايندګي نه کوي . خو د امريکا د بهرنيو چارو وزيرې کنډوليزا رائس بيا ويلي دي ،چې بش په بوټانو له ويشتلو څخه معلومېږي ، چې امريکا عراقيانو ته څومره ازادي ورکړې ده !.