هـــــایکو
زما په زمکه د هاتیانو جنګ دی
خلق یې ټول په تماشه ولاړ دي
پکې ټانټې مې د پټي ماتې شوي
ماښام خټک
غـــــــــــــــــــــــــــــــــزل
که په وطن کې په ظاهره د سپرلو نښې دي
زما په کلي کې لا اوس هم د ازغو نښې دي
زما د کور پته هم داده که راځې چرتـــــه کې
زما دکور په دیوالونو د ګولو نــــــــښې دي
ماته وزرې راکوي خو مېږتون هم څــــــــــاري
څومره ښکاره مې د وجود د ورکیدو نښې دي
داځل به څوکڅوک بختورخوند دتودوخې اخلي
یا د تازه سحر د لمر دراختو نــــــــــــښې دي
ستا د بنړو په سر سرخي دشفق رنګ مه ګڼه
زما په زړه کې ستا د سترګو د بڼو نښې دي
ماښامه چاته به د وران کلي کیسه کوی ته
دلته د هر سړي په مخ د حادثو نښــــــې دي
ماښام خټک کراچۍ
<<< سرپاڼه >>>
