یودنګ عکاس
چې اوږدې څڼې
یې پر غاړه پرتې
او پرې یې مازې ټینګه کړې
د شپو خولۍ ده.
یوه اونۍ وشوه
دې ښار کې
تصویرونه ګوري .
یوه اونۍ وشوه
ددې ښار
په لرغونو ودانیو ګرځي .
هغه د ښکلو
انځورونو مئین ،
ها د ښایسته
او د نازکو شېبو،
د تصویرونو ميئن ،
ددې لرغونې ودانۍ نه اخوا
خپله کمره ،
په دریو پښو،
په زوایه ایښې ده .
غواړي تاریخ
او ټول رنګونه
په انځور کې بند کړي .
هغه، د ښار د دنګو دنګو
ودانیو تږی .
هاپه دې ښار کې د غروب
درنګنیو تږی .
نن خورا زیات ستړی دی.
نن له غرمې راهېسې
په دغه ښار کې
د ورستي تصویر په تمه ولاړ .
وروستي تصویر
او هغه هم د لمر لویدو پر مهال
د ښار تر ټولو
د لوړ څلي تصویر .
♥♥♥♥♥
اخوا له کار ځینې
یو ستړې شاعر
هاغه د خیال پر وزرو
ښاپیرو وړی شاعر
هغه شاعر چې زړه یې
سم لکه ماښام
تنګ دی .
هغه شاعر چې
د یو وران څلي
په شان ړنګ دی .
په لار روان
غره ته د خپل یوه تاز نظم
په پای کې دی .
لمر په لویدو باندې دی .
شاعر ددې ښار
له واټونو ستړی ،
دلته له ټولو څراغونو ستړی ،
له دنګو دنګو ودانیو
نه یې بد راغلی .
د ښارله څلو، له کوڅو
ا و له برجونو ستړی ،
غواړي چې خیال یې
دې ښار له ودانیو څخه،
بهر ولاړ شي،
یوه غره ته یې سلا م یوسي .
غواړي د غره
او د شینکي اسمان
د ستور انځور،
د ښار په ټولو ودانیو
باندې ولګوي .
لمرپه لویدو باندې دی
شاعر ،
د خپل یوه تازه نظم
په پایه کې دی .
د دنګو دنګو ودانیو ترمنځ ،
په بېړه ، بېړه روان ،
له ځان سره ،
دخپل تازه نظم
بندونه وايي :
(( غره ، سلام !
غره ! موده وشوه
چې نه دې وینم .
له سینده هم
راته څوک نه شته
چې احوال راوړي
......))
لمر په لویدوباندې دی
شاعر له ځانه سره
دخپل تازه نظم
بندونه وايي :
خو یو ناڅاپه یې
اوږه د یوه بل چا
په څنګل لګېږي
لمر همدا اوس
د غره تر شا پنا شو.
یو دنګ عکاس
لمر پریوتو کې،
خپل ،تصویر خطاکړ
له غوسې شین اوښتی
بلخوا :
له یو شاعره ځېنې ،
غره ته لېکلی
وروستی نظم هېر دی .
۲۰۰۸د جنوري ۲۲
پراګ
