دا ښار ، هاغه غرونه
د شعرونو څلورمه ټولګه
اجمل اند
بسم الله الرحمن الرحيم
ډالۍ :
خپل پلرني کلي ( کوزبيار ) ته چې د رود شرنګ يې سندرې او د مازيګر رنګ يې مينه راښوولې ده .
ددې ټولګې په اړه :
د ټولګې نوم : دا ښار-هاغه غرونه
شاعــــــــــــــــــــر: اجمل اند
د چاپ کال : ١٣۸۵ل ل ، سلواغه
د چاپ شمېر : ١٠٠٠ ټوکه
کمپوزر : بريالى وياړ
چاپ چارې : وياړ
درنو لوستونکيو !
که څه هم په دې ورستيو کې مې په دې باور پوخ شوی چې د يوکتاب په سر کې راغلي اوږدې او لنډې سرېزې ، په دېرو حجرو کې له سندرو د مخه د سازيانو هغه ډنګ ډونګ ته ورته دي چې اوږدي شېبې خلک په تمه کي ساتي او دوی په بې مانا توګه خپلې د ساز وسيلې ګډوډې ډنګوي . ښايي دوی به دا کار په خپل منځ کې د هم غږۍ او سور د پېداکولو په موخه کوي خو د نندارچيانو زړونه ورسره خولې ته راځي .
خو زه يو وار بيا دا تېروتنه تکراروم او ددې ټولګې د شعرونو په اړه څوټکي ليکم :
وروسته له هغې چې د پېښور نه کابل ته راغلی يم نو په تېرو درېنيمو کلونو کې رانه لورى داسې ورک و، چې نه مې ځان ته پام و او نه شاعرۍ ته ، په دې ورستيو کې مې، چې په کابل کې د افغان ادبي بهير غونډو ته تګ راتګ پيل کړ نو يو وار بيا يې د خپلو زړو او نويو ماتو ګوډو شعرونو راټولولو ته وهڅولم . چې له دې امله ددې ټولګې په ليکلو کې ځان په کابل کې د افغان ادبي بهير د غونډو پوروړی بولم .
تر دې د مخه يوه بله ټولګه چې نېږدې څلور کاله د مخه يې د چاپ ځينې چارې هم پر مخ تللي وې راسره همداسې نا چاپه پرته ده ، ما غوښتل دا شعرونه هم له هغې سره يو ځای کړم ، خو دا چې د چاپ چارې يې راباندې له سره نه شي نو و مې پتيله چې جلا يې چاپ کړم . په دې ټولګه کې مې څو سرليکه هغه شعرونه هم ځای کړي چې له پخوانيو هغو نه پاتې وو . په دې هېله يم چې خدای وکړي شعرونه به يې لږ تر لږه ددې پاڼو د تورولو ارزښت ولري
دا چې دا ټولګه مو په لاس کې اخيستي مخکې له مخکې مو مننه کوم . کور مو ودان.
په مېنه او درناوي
اجمل اند
١٣٨۵ مرغومي ١ – کابل مکروريان
