دا کلی د جلال آباد ښار نه لمر خاته لور ته په لس کيلو مترۍ کې پروت دی. دا کلی ثمرخيل نوميږي چې د بهسودو ولسوالۍ پورې اړه لري. د کلي شمال ته د کنړ سيند په مستۍ سره تيريږي. زموږ د کلي او کامې ولسوالۍ تر منځ همدا د کنړ سيند روان دی. پخوا به د کاموالو تګ راتګ جلال اباد ته د ثمرخيلو له لارې کيده چې خلک به په يوه تنابي جاله کې پوريوتل راپورې وتل. لمر خاته ته يې  د ثمرخيلو غر پروت دی چې د غره تر شاه د ګردي کڅ په نوم يو وړوکی کلی آباد دی چې دا کلی هم د بهسودو ولسوالۍ پورې اړه لري. جنوب ته يې  د تورخم او جلال اباد تور سرک غځيدلی دی او لمر پرواته يې د سراچه علی خان په نوم کلی پروت دی.