ښځه
مونږ هميشه ښځې ته
د خپل شهوت له دروازې کتلي
مونږ هميشه ښځه
د نارينه د څو شيبو د خوشالۍ لپاره

يوه اله ګڼلې
مونږ هميشه ښځه
په مقابل کې د ځان
د بې ارزښته مات خاورين لوښې نه ټيټه ګڼو
او داسې نور درواخله
خو مونږ هيڅکله
د انسانيت ددغې نيمې نړۍ
معنوي اړخ ته قايل شوي نه يو
مونږ ښځه تل
دمور خور لور او د ميرمنې په نوم ياده کړې
بس له ادمه تر دې دمه پورې
ددې شعار سيوري ته ژوند تيره وو
هغه رښتونى حق چې ښځې ته اسلام او انسانيت ورکړې
مونږ د غرور ګونډې وهلې پرې
او پټ يې ساتو
ځکه که دا حق ورکړو
نو بيا خو دې نړۍ کې
مونږ بې غيرته او کچه خلک يو

سيدجيلاني جلان