د ډبرپېر وحشت بلهارو ته: پوهانددوکتورم.ا.زيار
اکسفورډ،11-11-08
د ارواوو ننواتې
له هماغه خونړي او بوږنوړي شومه دمه
چې څيرونکو وينې څښونکو شرمښانو،
د تيارو او تورتمونو د تورزړو ګروهمنانو…
وينې څښلي د غرڅانو، غزالانو.
#
لا تراوسه هلته لرې،
دکنډر کنډر کورونو او کلاوو نه
وراخوا،
د سپېرو رغځيو پای ته
د تور غره پر هسکه ډډه غځېدلې
هديره کې د ميوند د شهيدانو پر قبرونو،
له تياره توره ماښامه،
د سپېڅلي سباوون تر سپېده داغه…
درسته شپه ډيوې بلېږي
تتې تتې او نيمزالې.
#
پريوځای سره راټولې څو ارواوې،
=لولنګرې نا اشناوې=
چوپه خوله ګډې پر وير او ننواتو،
ښوروي زړې جنډې
راننګوي د تېرو هېرو اتلانو،
د ملالې او ايوب د جنګيالو پاکې ارواوې.
#
ګوندې زور يې پر هغو لېوانو برشي
او وروژغوري ترې هغه
نيم شپېللي پرې سرونه…
چې يې يوسي د سبا نارنجيستان ته،
تر هماغه ويرژړلي الينګاره
چې لاسترګې دي پر لار ورته تنې د سر پرېکړو،
=د کار زيار د رزمياليو=
د نامرادو، ارمانژلو،
د بلهارو، سور کفنو شازلميو!!؟
.
