د فطرت محبتونه

د خوبانو تصويرونه زړه پرهر کړي
په خپل فن باندې خو جوړ هم لوى اختر کړي

د نظمونو د قيصو الهام به اخلي
چې غزل ئې ژبه غوڅه د کوثر کړي

چې ماشوم زړګى د کاڼي کرښه کش کړي
جادوګر لفظونه ځان ورته دلبر کړي

د نظر کاسه د سترګو په غوبل کې
د خيالونو په درشل کې شور او شر کړي

چې جوهر ئې د ګلاب پاڼو کې ځاى شي
د کتاب پاڼې قلم په وينو سر کړي

د فطرت د شينکي باغ محبتونه
چې نسيم ستورى خپل زړه پکې افسر کړي