ورکه مينه
يو هېر شوى غوندې خوب وي
يو ورک شوى غوندې خيال
چاله سل د اسمان ستوري
چاله يو د تندي خال
څوک لګيا وي، ايرې ګوري
چې يو لال پکې پيدا کړ
تورې شپې د زلفو ټولې
د سحر په نيت سبا کړي
خو وخت داسې ادا وکړي
چې په زړه کې رازرغون شي
ها د ورکې مينې زړى
رازلمى شي او جنون شي
نو د مينې په راز پوه شي
فلسفي د ژوند د لارې
هرې خوا ته پسرلى کړي
د مين د وينو دارې
هره داره نذرانه وړي
د جانان د سترګو نور له
له خپل غم له خپل سرور نه
واخلي ساه د يار غرور له
د هستۍ په ډرامه کې
يو سپېڅلى شان اتل شي
چې له واړو انتخاب وي
د غزل بيت الغزل شي
د مجاز په پوړو پورته
ورسېږي تر وصلته
مرګ يې هم نشي وژلاى
شي ورپورته تر وحدته
د عاشق، معشوق ګډون وي
د جانان او جنون مينه
د ليلا په رنګ کې رنګه
شي د ښکلي مجنون وينه
