غزل

درد به يې واخلو، درد زمونږه د روزګار برخه ده

خوښي به ورکړو ځکه دا خو مو د يار برخه ده

 

زما د هر سوال ځواب کې ستا درنه خاموشي

ښکاري لمر مخيه چې همدا دې دانکار برخه ده

 

د تورو زلفو په تيارو کې دې د سپين مخ رڼا

په توره شپه کې دې ساتلې د سهار برخه ده

 

مونږ ورته زړونه مخ کې کېدو دوی يې پښو لاندې کړي

څه زورور دي ښکلي، دا يې د رفتار برخه ده

 

ملګري ډېر لرم يو نيم مې د لستوڼي مار شي

ټک راکوي زما وجود يې د ګذار برخه ده

 

عشقه ستا درد مې تر دا ننه پورې پټ ساتلی

عشقه په سترګو کې سرخي مې د خمار برخه ده