راځئ روژه استقبال کړو- د روژې د درسونو سلسله (١)

روژه هرکال راځي، اوس هم د معمول په څير رارسي، خو آيا موږ روژې ته تيار يو؟! آيا موږ هرکال دا د برکتونو مياشت سمه لمانځو او کنه؟! دا هغه پوښتنې دي چې ممکن ډيرې يې مثبت ځواب ورنکړي، دا چې ولې يې مثبت ځواب نشي ويلى د دې علتونه ګڼ دي، يا به انسان لټ وي، يا به نه پوهيږي چې څرنګه روژه استقبال کړي، دلته موږ ځنې لارښوونې لرو چې که څوک يې پرځان پلې کړي د روژې په استقبال کې به ورسره ډيره مرسته وکړي.
د روژې لپاره څو ډوله تيارى نيول کيږي چې په لاندې ډول دي:
لومړي: دى مبارکې مياشتې ته نفسي او عملي تياري نيول:
١ - د دعاګانو لوستل:
). أ- ( اللهم بارك لنا في رجب وشعبان وبلغنا رمضان
ب - ( اللهم سلمني إلى رمضان وسلم لي رمضان وتسلمه مني متقبلاً).
٢ – د ښو او نيکو کارونو نيت کول:
د نيت ښه کولو په اړه په صحيح مسلم کې يو حديث له ابوهريره (رضي الله عنه) څخه روايت دې چې الله جل جلاله په يوه قدسي حديث کې فرمايي: کله چې زما بنده د نيک عمل اراده وکړي، اجر او ثواب يې ورته ليکل کيږي
هغه نيتونه چې په دې مياشت کې وشي په لاندې ډول دي:
١ – د قرآن د څو څو ځله ختمولو او په تدبر سره د تلاوت کولو نيت.
٢ – له ټولو ګناهونو څخه د زړه له تله توبه ويستل.
٣ – نيت کول چې دا مياشت به د ټول عمر لپاره د نيکو او صالحو اعمالو پيل وي.
٤ – نيت کول چې په دغه مياشت کې ترټولو لوى اجر او ثواب لاسته راوړلى شي، په داسې حال کې چې په دې مياشت کې نيک عمل له نورو مياشتو څڅه ډير اجر لري.
٥ – په دې مياشت کې نيت کول چې له خلکو سره به ښه اخلاق، نيک سلوک، ښه معامله کول هم ډير ضرور دي.
٦ – نيت کول چې په دې مياشت کې به اسلامي دعوت ډير کوم او خلک به اسلام ته د نورو مياشتو په نسبت ډير رابلم.
٧ – نيت کول چې په دې مياشت کې به د ځان له پاره يو منظم تقسيم اوقات برابروم چې له اطاعت او عبادت څخه ډک وي او عمل به پرې کوم.
٣ – ايمانې مطالعه کول: 
له ايمانې مطالعې مطلب دا دې چې په دې مياشت کې د دې مياشتې اړوند ديني کتابونه مطالعه کول، تر څو په ايماني عاطفې سره ځان دې مياشتې ته د اطاعت او عبادت لپاره برابر کړو.
٤ – د دې مياشتې په اړه ډير کتابونه شته، هغه وروڼه چې په عربي پوهيږي د لطائف المعارف کتاب کې دې د وظائف شهر رمضان باب ولولي او ښه پايله به لاسته راوړي.
٥ – د شعبان په مياشت کې روژه نيول:
د شعبان د مياشتې د روژې نيول ډير ثواب لري او په دغه مياشت کې روژه نيول د رمضان د مياشت لپاره انسان تياروي، عائشه رضي الله عنها فرمايي: وما رأيته صلى الله عليه وسلم أكثر صياماً منه في شعبان. يعني نبي کريم صلي الله عليه وسلم په دغه مياشت کې ترټولو نورو مياشتو ډيره روژه نيوه.
٦ – د روژې په اړه مهمو درسونو کې چې په سيډيانو کې اړول شوي يا کسټو کې دي غوږ نيسي، تر هغې چې روژه رارسي ښه به ورته آماده وي، د ځان لپاره پروګرام جوړ کړه چې مثلا د ورځې به يوه او يا دوره کسټې اورم، چې په لنډه موده کې به يې پايله وويني.
٧ – د روژې د مياشتې دا مبارکي درپه يادوي، مثلا د مغفرت مياشت ده، د ګناهونو د بښل کيدو مياشت، د ليله القدر مياشت، د اجر او د ثواب د ډيريدو مياشت او... دا هم د روژې د استقبال ښه لار ده.
٨ – د روژې په اړه د قرآني ايتونو تفسير مطالعه کړئ.
٩ – د روژې د مياشتې په اړه جلسې او ناستې وکړئ:
په دې مياشتې کې له هغه چا سره کينئ چې تقوى لري او له خدايه ډير ويريږي په مينه کينئ او د روژې د فضايلو په اړه بحثونه کوئ، داسې ناستې د انسان پر زړه طبيعي اثر لري.
١٠ – له خپل معاش او عايد څخه په دې مياشت کې د ځنو کارونو لپاره وقف کړى چې لانديني يې له مهمو څخه دي: 
_ د صدقې لپاره
_ د کتابونو د اخستو او په هغو کسانو يې د توزيع لپاره چې مطالعه کوي يې.
_ د خلکو لپاره د افطار يا روژه ماتي د پروژو سره د مرستې له پاره.
_ حقيبه الخيري، حقيبه الخيري ديته وايي چې پر غريبو خلکو خوراکي موادو ويشل کيږي يا پيسې ور کړئ او له هغو سره مرسته وکړئ.
_ د عمرې د اداء کولو لپاره حرم ته تلل.
١١ – د روژې آداب او احکام زده کړئ:
د روژې په اړه په مساجدو يا په نورو علمي ځايونو کې پروګرامونه جوړيږي چې په هغو کې برخه اخستل درسره مرسته کوى چې د روژې آداب او احکام زده کړئ.
١٢ – د روژې د رارسيدو په اړه چې کوم پروګرامونه، محاضرات وي هغوى ته ورځئ.
١٣ – په کورکې ناسته او د کورنۍ له غړو سره د دې محترم ميلمه د رارسيدو په اړه پروګرامونه جوړول، مثلا کورکې يوه ته دا وظيفه ورکړل شې چې ته به کلي کې په خلکو د روژي اړوند کيسټې توزيع کوې او داسې نور پروګرامونه تر څو خلکو ته مو ګټه ورسي.
دوهم: دعوتي تياري
داعي په دغه مياشت کې دا ډول تياري نيسي:
١ – د روژې په استقبال کې په خلکو د کيسټو ويشل، د درسي پروګرامونو تيارول، د روژې په اړه د رسائلو توزيع کول، د مسواک ويشل، که څوک کولى شي او پوهه لري خلکو ته درس ورکول او داسې نور.
٢ – د روژې په اړه د وړو رسائلو ليکل، د داسې رسائلو چاپول او خلکو ته پکې د هغوى د وظايفو په ګوته کول چې په دغه مياشت کې څه وکړي.
٣ – د ځنو مهمو خبرو او اسلامي توجيهاتو برابرول او په مسجد کې يې د خلکو په وړاندې ويل او هغوى په دغو مسايلو پوهول.
٤ – د کورنۍ تربيه د ورځني او اونيز درس په واسطه.
٥ – د اسلامي کتابونو او کسټو په هغه چا توزيع کول چې ورته اړتيا لري.
٦ – په مکتب کې خپلو شاګردانو ته کله ناکله د روژې د فضائلو په اړه درسونه تيارول.
٧ – د افطاري پروګرامونو جوړول او خلک ورته رابلل.
٨ – د اسلامي موسسو سره دعوتي مرستې.
داعي وروره:
هرڅه چې کولى شې په دغه مياشت کې يې د مسلمانانو لپاره وکړه، کوښښ کوه خپله طريقه بدله کړې، هره ورځ له نوي طريقې څخه کار اخله، ترڅو روژې ته خلک تيار شي او په خلکو کې يو لوى تغيير راشي.