ځوانه او مشـــهوره ســــندرغــــاړې غزالــــــه جاویــــــد یې هـــــم ووژله

د پښتو ژبې مشهوره سندرغاړې غزاله جاوېد د پاکستان په پېښور ښار کې له خپل پلار سره يو ځاى د ناپېژانده کسانو له خوا ووژل شوه.

دغو وسلوالو، چې پر موټرسايکل سپاره وو، پرون ماښام ناوخته د پېښور ښار د ډبګرۍ په سيمه کې پر غزالې او د هغې پر پلار ډزې وکړې دواړه یې ځای پر ځای وژلي دي.

د پېښو ښار د پوليسو يوه افسر حاجي امتياز د پېښې په ځاى کې خبريالانو ته وويل، چې غزاله له يوې ارايشګاه څخه د وتلو په حال کې وه، چې پرې ډزې وشوې.

هغه زياته کړه، چې بريد کوونکي د دواړو له وژلو وروسته په تېښته بريالي شوي، خو پوليسو يې په اړه پلټنې پيل کړې دي.

نوموړى وايي، چې غزاله د کورنۍ شخړې له امله وژل شوې ده.

خو د غزالې ورور فرحت جاويد تور پورې کړى چې پلار او خور يې د غزالې د پخواني خاوند ملک جهانيګر له خوا وژل شوې دي.

هغه زياته کړه:

((موږ په خپل کور کې ناست وو، چې ملک جهانګير له درېيو نورو وسلوالو سره راغى او زما پر خور او پلار يې ډزې وکړې او دواړه يې ووژل.))

نوموړى وايي، چې د پوليسو په پوسته کې يې د ملک جهانګير پر ضد عريضه کړې، خو پوليسو تر اوسه هغه نه دى نيولى.

غزاله جاوېد د خيبر پښتونخوا ايالت د سوات سيمې اوسېدونکې وه د دواړو مړي سوات ته وېوړل شول.

غزاله جاويد دوه کاله مخکې د پېښور ښار له يوه اوسېدونکي ملک جهانګير سره واده کړى و، خو له نهو مياشتو وروسته د دوى ترمنځ اړيکې خرابې شوې، چې تېر کال د ډسيمبر په مياشت کې يې د سترې محکمې له لارې له خپل خاوند څخه طلاق واخيست.

د غزالې جاوېد د خوږ اواز په لر او بره سيمه او نوره نړۍ کې ډېر مينه وال درلودل.

دا په داسې حال کې ده، چې له دې مخکې هم په پېښور او بلوچستان ايالت کې پر ښځينه سندرغاړو ورته بريدونه شوي او وژل شوې دي.

له دې مخکې دوه نورې سندرغاړې ياسمين ګل او ايمن اوداس هم په دغه ډول بريدونو کې وژل شوې وې. 

دغزاله جاوید یوڅو سندرې دلاندې لینکونو په مرسته لیدلای او اورېدلای شئ:

http://www.youtube.com/watch?v=UMMy4qafFLU

http://www.youtube.com/watch?v=6OdekLgvJzE&feature=related

http://www.youtube.com/watch?NR=1&v=_V9ikCat42s&feature=endscreen

http://www.youtube.com/watch?feature=endscreen&v=EhF9VmDj0sw&NR=1

http://www.youtube.com/watch?NR=1&feature=endscreen&v=1_muiuzC-tk

http://www.youtube.com/watch?v=d4Jb4FWXew8&feature=related