جنګي کلا ته نژدې ډله ییز قبر وموندل شو
تاند(چهارشنبه/جنوري۴) د افغانستان په شمال کې یو ډله ییز قبر د سې شنبې په ورځ هغه مهال وموندل شو چې کارګرو د مزارشریف په دهدادي ولسوالۍ کې د ملي اردو د یوې ودانۍ لپاره مځکه کیندله.
افغان مقامات وايي چې د لسو تنو مړي یې راایستلي خو د نورو له راایستلو منع شوي دي.
دا قبر له جنګي کلا دوه کیلومتره لري موندل شوی- عکس نن اخیستل شوی/جنوري۴۲۰۱۲
یوشین پړی لیدل کېږي چې دا کسان پرې تړل شوي وو
تاند ته رارسېدلي راپورونه وايي چې دا قبر جنګي کلا ته نژدې موندل شوي او پکې ښخ شوي کسان د نولس سوه نوي یمې لسیزې د جګړې د کلونو دي.
د افغانستان د ملي اردو یوه ویندوی محمد ناهیم وویل:«موږ له قبره د لس – پنځلس تنو هډوکي راوایستل. بیا مو د مځکې له کیندلو لاس واخیست.»
ناهیم زیاته کړه چې له اردو څخه د بشري حقونو ټولنو وغوښتل چې د قبر کیندل ودروي ځکه چې دوی غواړي په دې برخه کې تحقیقات وک
ړي.
د مړو سکلیټونه، جامې، جمپرونه لیدل کېږي او په عین حال کې دا هم څرګندېږي چې د دغو کسانو لاسونه د شا له خوا په شین پړي تړل شوي دي.
د بشري حقونو د خپلواک کمیسون د سیمه ییز دفتر رييس سید محمد رویټرز خبري اژانس ته وویل چې ملي اردو نن/چهارشنبه/ د دوی په غوښتنه په دغه قبر کې کیندنې درولي دي.
د سید محمد په وینا د بشري حقونو کمیسون به په دې اړه تحقیقات وکړي چې دا کسان دقیقاً کله او چا وژلي دي.
د افغانستان په شمال په تېره بیا بلخ ولایت کې څو ځلي طالبان قتل عام شوي او د طالبانو له لوري د دوی مخالفان هم په ډله ییز ډول وژل شوي دي.
خو ناهیم وايي «ژره به څرګنده شي چې دا کسان څوک ول او چا وژلي دي.»
د ملي اردو چارواکي وايي چې په دې قبر کې ممکن خورا زیات کسان ښخ وي.
دنښتر ویبلاک یادښت :
له تصویرونوڅخه ښکاري، چې پېښې په ژمني موسم کې صورت نیولی همداراز دمړيو له ککریو څخه داسې مالومیږي ، چې پښتانه به وي، موږ د خپلو مسلکي مالوماتو له مخې دافغان توکمونوله قد، دسر او مخ له قالب (جوړښت) جامو او ثلیقې څخه مالومولای شو، چې دا په کوم توکم پورې تړاو لري په هرصورت موږ ته دا په زړه پورې او دپوښتنې وړ ده، چې دطالبانو دقطر د دفتر له جوړېدو سره څنګه په یومهال دا قبر راوسپڼل شو؟
له تاند څخه په مننه
