ايران پر ترکيې باندې د بريد ګواښ کړی

 د ايران حکومت ويلي، که چېرې د دوی پر اتومي تاسيساتو باندې بريد وشي، دوی به  پر ترکيه باندې بريد وکړي.

د ايران پارلمان د ملي امنيت او د بهرني سياست د کميسيون مرستيال شيخ حسين ابراهيمي ګواښ وکړ، چې پر ايران باندې به تر هر ډول بريد وروسته، سپاه پاسداران پر ترکيه بريد وکړي. نوموړي د ايران  د لوړ پوړي پوځي چارواکي حاجي زاده هغه خبرې تاييد کړې، چې ويلي و: (( که امريکا زموږ پر اټومي بټيو بريد وکړي، موږ به لومړی په ترکيه باندې بريد کوو، ځکه هلته د ناټو رادارونه  موجود دي.))

په دې وروستيو کې د ايران او ترکيې تر منځ اړيکې ډېر ترينګلي شوي او په امريکا کې د ترکيې سفير وويل: که چېرې امريکا له ايران سره کوم ډول جوړ جاړي ته هم ورسيږي، موږ  په خپل ګاونډ کې يو اتومي هېواد نه غواړو.

د ايراني چارواکو څرګندونې دا مانا هم لري، چې پر دوی باندې تر بريد وروسته به  ايران پر افغانستان هم بريد کوي.

د کارپوهانو په اند د افغانستان حکومت  بايد په رسمي توګه د ايران د اټومي پروګرام په مقابل کې يو دريځ درلودی، خو څرنګه چې په حکومت کې د ايران حکومت معاش اخيستونکي ډير دي نو دا کار په اوس وخت کې ناشونی ښکاري.