د امريكا متحده ايالتونو جمهوري غوښتونكى سناتور جان مكين وايي

د ناټو په بمبار كې د پاكستاني ځواكونو په وژل كېدلو خواشينى دى، خو دا يادول هم مهم دي چې په پاكستان كې ځينې ادارې په افغانستان كې د نړيوالو ځواكونو د برياليتوب په مخ كې خنډونه اچوي.

نوموړي په يوه وينا كې زياته كړې، د پاكستان څارګره اداره د حقاني شبكې او نورو ترهګرو ډلو ملاتړ كوي چې په افغانستان كې امريكايي او ناټو ځواكونه وژني، همدارنګه په سړك غاړې بمونو كې كارېدونكي مواد هم د پاكستان په دوو كمپنيو كې جوړيږي.

د امريكا په مشرانو جرګه كې نامتو جمهورى غوښتونكى او د بهرنيو اړيكو د جرګه ګۍ غړى ريچارډ لوګر هم وايي، چې د اسلام اباد او واشنګټن اړيكې خورا پېچلې دي او غوښتنه يې كړې چې امريكا دې پاكستان ته خپلې مرستې بندې كړي.

امريكايي چارواكي باور لري چې پاكستان د ترهګرۍ ضد جګړه كې ورسره رښتينى نه دى او په دغه هيواد كې نوې شمېرنه هم ښيي چې ډېرى امريكايان پاكستان خپل ملګرى نه بلكې دښمن بولي.

د ناټو په بمبار كې د ۲۴ پاكستاني پوځيانو له وژنې يوه ورځ وروسته په نظرپوښتنه كې ۵۵ فيصده امريكايانو ويلي چې پاكستان يې دښمن دى، ۷ فيصده ګډونوالو ويلي پاكستان د امريكا ملګرى دى، ۲۶ فيصده فكر نه كوي چې پاكستان دې د امريكا دښمن او لا هم دوست وي او د شمېرنې ۱۲ فيصده ګډونوال چوپه خوله پاتې شوي دي.

په شمېرنه كې دا هم ويل شوي چې د پاكستان خلك په قبايلي سيمو كې د بې پيلوټه الوتكو بريدونو غوسه كړي چې د القاعده او وسله والو ډلو پر جنګياليو سربېره ولسي وګړي او همدارنګه د پاكستان امنيتي ځواكونه كله كله په كې ټپيان او وژل كيږي، خو امريكا دا ډول بريدونه د ترهګرۍ ضد جګړه كې اغېزناك بولي.

په دې شمېرنه كې د امريكا جمهوري غوښتونكي ګوند په سلو كې ۷۰ غړي هم پاكستان ته د دښمن په سترګه ګوري، ۶ فيصده يې خپل ملګرى بولي، ۱۲ فيصده يې نه دښمن او نه ملګرى بولي او ۱۲ نور يې په اړه كوم نظر نه لري.

د امريكا ډيموكراټ ګوند ۴۷ فيصده غړي هم پاكستان خپل دښمن بولي او ۲۲ فيصده د ملګري په سترګه ورته ګوري، ۳۰ فيصده يې نه دوست بولي او نه دښمن او ۱۲ فيصده يې په اړه كوم نظر نه لري. همدارنګه په سلو كې ۴۵ امريكايان پاكستان د امريكا دښمن بولي، ۴ فيصده يې ملګرى بولي او ۳۷ فيصده يې نه دوست او نه دښمن بولي او همدارنګه ۱۴ فيصده چوپه خوله بهتره ګڼي.

۳۰ـ۱۱ـ۲۰۱۱ خدمتګار