|
|
د عزيزالله خان رالېږنه
پۀ اوسنۍ پرمختللې نړۍ کې د نيويارک، شيکاګو او نورو لوړو ودانيو پۀ اړه ټول خبر دي، خو کېدای شي ډېر کم خلک لۀ دې خبر وي چې د يمن پۀ يوۀ ښار کې دوه زره کلنې زړې د (شيبام) ودانۍ لۀ خاورو او خامو خښتو نه جوړې شوې دي .
د دې ودانيو شمېر (٥٠٠) دی، او لۀ (٥) څخه تر (١١) پوړيزو لرونکې دي چې لۀ همدې امله پۀ نړۍ کې لۀ خاورو څخه د جوړو شويو لوړ پوړيزو ودانيو شهرت ور پۀ برخه دی .
پۀ دغو ودانيو کې يې ځينې تر ١٠٠ فټه هم لوړې دي ، دا ښار چې ٢٠٠٠ کاله پخوانی دی ، کله ، کله دا فکر کيږي چې دابه دشپاړسمې پېړۍ ښار وي ، دا ښار هم د نورو ښارونو پۀ څېر بدلون مومې هغه داسې چې پۀ تېرو څو پېړيو کې يې ځينې کورونه د دويم ځل لۀ پاره جوړ شوي دي .
لۀ پيړيو نه وروسته د کورونو د دويم ځل جوړول د بارانونو لۀ امله ؤ چې پۀ دوامداره توګه ورته يو لوی ګواښ دی، د کورنو د ژغورنې لۀ پاره به ځايي اوسېدونکو دېوالونه او بامونه پۀ پنډې او ډبلې خټې سره پوښل .
شل کاله وړاندې ځايي اوسېدونکو د هوسا ژوند پۀ لټون دا ځايونه خوشې کړل او لاړل چې پۀ نتيجه کې دا ځای د بارانونواو سېلابونو لۀ ګواښ سره مخامخ شو، خو د ښار د رغونې د پروګرامونو لۀ امله دا ښار وژغورل شو.
پۀ ٢٠٠٨ ميلادي کال کې د سختو سېلابونو لۀ امله د ودانيو بنسټونو ته ډېر تاوان ورسېد او ان دا ځای يې تر نړېدو پورې ورساوۀ .
د يونسکو پۀ نړۍ وال کلتوري ميراثونو کې دا يوه ډېره زړه او بهترينه بېلګه ده .
|
|
