شېبه مخکې دلته بیا زلزله وشوه

شېبه مخکې دلته بیا وېره خوره شوه

شېبه مخکې دا خبره بیا کره شوه

چې په ژوند باندې شېبه اعتبار نشته

                                           *********************

شپه وه زلزله وه، ځمکه څنګه پرېشانه وه
ځمکه تمبېده ځمکه بېړۍ غوندې روانه وه

څوک په توبو سر و، تښتېدلي دچا غړي و
میندو خوبولي ماشومان په اوږه کړي و

خلک له کورونو نه بهر ته خطاوتي وو
خلک وارخطاو لویو لارو ته را وتي وو

څوک چې پټ پنا څوک چې په زغرده ګناهګار و
ټول وو سا نیولي، هر سړی په استغفار و

اوس که لویه ربه تر کوم بام و دېوال لاندې شو
سم به د شیخانو ملایانو تر سوال لاندې شو

خامخا به وایي په دې خلکو عذاب راغی
دا پرې د ناپاکو عملونو عقاب راغی

کاشکې خو مو مړي له تهمته په امان وای
کاشکې افغانان هم لکه واړه انسانان وای