قرار : د لاهور او سیستان د ځانمرګو بریدونو په اړه، چې پرې خفه یو خو له خولې وتلي ښېراوي نه را ستنېږي

زما ښېرا ده در پسې، زما ازار درپسې
اوس به وار راکړې چې صحنې دې کړمه شمار در پسې

ستا د محل د آینو ځلا به پاتې نشي
زما له ړنګې خونې درغی غبار درپسې

چې دې زما د کور په لاره وه راسیخه پرون
در درومي هغه بلا ډېره په تلېوار درپسې

ستا د عمل لپاسه بله بلا نشته نوره
دا ستا عمل دی، دا چې وینې دا کفار درپسې

ښېرا د بورو، او آهونه د بې وسه ولس
بم د ځانمرګو، او شعرونه د قرار در پسې