شاته

د بامیان معترض پښتانه او تاجک: له هزاروو سره برابر حقونه غواړو

د انځور حقوق .
Image caption دوی وايي، تر هغه به اعتراض کوي چې غوښتنې یې منل شوې نه وي.

د بامیان د کهمرد ځینو اوسېدونکو دغې ولسوالۍ ته د نوي ټاکل شوي ولسوال پرضد دریمه ورځ هم اعتراض کړی دی.

دوی د کهمرد ولسوالۍ مخې د اعتراض خیمه درولې او له حکومت د دوو غوښتنو پوره کېدل غواړي.

دوی وایي، حکومت باید د سیمې د خلکو په خوښه ولسوال وټاکي او بل د دغه ولایت له هزاره اوسېدونکو سره برابر حقونه ور کړل شي.

* بامیان کې د مور او ماشوم عصري روغتون پرانیستل شو

* د ولسي جرګې وکیل بامیان کې د الوتکې کېناستلو مخه ونیوله

د دغه خوځښت مشر محي الدین فرهمند وایي، د کهمرد لپاره نوی ټاکل شوی ولسوال شریف امین یار دوی ته ځکه د منلو نه دی چې نوموړی د سرپل په صیاد ولسوالۍ کې په خپله دنده کې بریالی نه و.

"د سرپل د صیاد پخوانی ولسوال شریف امین یار چې د همده د کار او مدیریت پرمهال د میرزا اولنګ ناورین رامنځته شو، د کهمرد خلک د هغه د مدیریت پر وړتیا باور نه لري".

دی وایي، دوی د سیاسي مشارکت غوښتونکي دي. داسې څوک باید د ولسوال په توګه وټاکل شي چې د سیمې خلکو ته د منلو وي.

د هغه په خبره، د کهمرد خلک دا کس د ولسوال په توګه نه مني:

"درې ورځې کېږي چې خلکو اعتراض کړی. ترڅو چې مو غوښتنې ونه منل شي، اعتراض به دوام ولري".

د ځايي ادارې ځواب

ر د انځور حقوق .
Image caption د بامیان پښتانه او تاجک له څو کلونو راهیسې وخت ناوخت د ځايي ادارې پرضد ورته اعتراض کوي.

خو د بامیان د والي ویاند عبدالرحمن احمدي بیا دا ادعاوې ردوي او وایي، کهمرد ته نوی ولسوال د مرکزي ادارې لخوا ورپېژندل شوی او دوی یوازې د کابل حکم عملي کوي.

موږ د افغانستان د اساسي قانون او د مرکزي ادارې د حکم تابع یو:

"دوی د کهمرد ولسوالۍ د سرپرست په توګه د ټاکل کېدو مکتوب راوړی، نو موږ مکلف یو چې ادارې ته یې وروپېژنو".

بلخوا د محلي ارګانونو ادارې چاروکي وایي، شریف امین یار د ازاد رقابت له مخې، بریالی شوی او د ولسمشر په لاسلیک د کهمرد د ولسوال په توګه ګومارل شوی دی.

د دغې ادارې یوه مطبوعاتي چارواکي انور وفا بي بي سي ته وویل، د اعتراض کوونکو د ادعاوو په تړاو به څېړنه وشي.

د بامیان پر ماسټر پلان نیوکې

د انځور حقوق Getty Images
Image caption د بامیان پښتانه او تاجک وايي، نوی ښار یواځې هزاروو ته ور کړل شوی دی.

بامیان د افغانستان له مرکزي ولایتونو دی چې د یو شمېر پښتنو په ګډون پکې درې قومونه اوسېږي، خو ډېره برخه اوسېدونکي یې هزاره او تاجیک دي.

له څو کلونو راهیسې ځینې کسان چې ځانونه د پښتنو او تاجکو استازي بولي اعتراض کوي او وايي، چې په دغه ولایت کې د دوی حقونه تر پښو لاندې کېږي.

دوی د بامیان ښار پر مسټر پلان هم نیوکې لري او وايي، دوکانونه یې ټولد پخواني ولسمشر د مرستیال کریم خلیلي لخوا هزاره ګانو ته وېشل شوي.

خو د بامیانو ولایتي ادارې، تل د تبعیضي چلند ادعاوې بې بنسټه بللې دي.