د افغان ځانګړو ځواکونو شمېر دوه برابره کېږي
د دفاع وزارت چارواکي وايي، د ځانګړو ځواکونو فرقه چې ۱۷ زره ځانګړي ځواکونه پکې دي، په قول اردو بدلوي چې هر قول اردو له دېرشو زرو ډېر ځواکونه لري.
د دغه وزارت مرستیال ویاند محمد رادمنش وايي، اړیتا ده چې افغان کومانډو ځواکونه لا پیاوړي او ښه سمبال شي: ((د افغانستان ځانګړي ځواکونه د سیمې په کچه پیاوړي ځواکونه دي او د ملي دفاع وزارت پرېکړه کړې چې د د غو ځواکونو قطعه په قول اردو بدله کړي.))
د افغانستان د ځانګړو ځواکونو فرقه د څه باندې شلو وسله والو ډلو پر وړاندې چې د نظام پر وړاندې جنګېږي، کلک دفاعي سنګر دی چې دمګړۍ د ټولو افغان ځواکونو کابو ۷۰ سلنه نظامي عملیات ور له غاړې دي.
نظامي کار پوهان وايي، د دغو ځواکونو زیاتیدل به له سختدریځو سره د جګړې په میدان کې د دولت په ګټه تمام شي.
د پوځ مخکینی جنرال عتیق الله امرخیل وايي، د افغانستان پوځ زیاتره ځواکونه جبهه یي جګړو ته روزل شوي دي، په داسې حال کې طالبان د برید او تېښتې په ډول حملې کوي او له دوی سره جګړه هم ځانګړو ځواکونو ته اړتیا لري:
((ځانګړي ځواکونه ډېر پیاوړي دي، دولت باید د ملي اردو د جوړېدو پر مهال دې ته متوجه شوی وای، چې ور له غاړې جګړه مخامخ جګړه نه ده، بلکې غلچکۍ (چیریکي) جګړه ده او د دې لپاره ځانګړي ځواکونه پکار دي.))
د ناټو جنرالانو په ګډون چې د افغان ځواکونو په روزنه او تجهیز کې برخه لري، ډېری یې افغان ځانګړي ځواکونه په سیمه کې بې جوړې هغه بولي.
ځانګړي ځواکونه د افغان امنیتي ځواکونو په جوړښت کې اته کاله مخکې د خاصو او له ګواښونو ډکو عملیاتو لپاره رامنځ ته شول.
حکومت وايي، ځانګړو ځواکونو د تېر کال په وروستیو نهو میاشتو کې د طالبانو ۴۰۰ مخکښ کسان له منځه وړي.
د دغو ځواکونو د کار ډول د امریکا سمندري ځواکونو ته ورته دی، شپني عملیات چې پخوا به بهرنیو ځواکونو تر سره کول اوس افغان ځانګړي ځواکونه پر مخ وړي.
