نړیوالې بشري ډلې په غزه کې اوربند غواړي

د بې سرحده ډاکټرانو، د بخښنې نړیوال سازمان او د اکسفام په ګډون د ۱۳ لویو بشري سازمانونو ایتلاف د نړۍ له مشرانو څخه وغوښتل چې په غزه کې د اوربند لپاره هڅه وکړي.

دغو ټولنو د چهارشنبې په ورځ نومبر ۸ (لړم ۱۷) د فرانسې له ولسمشر ایمانویل مکرون او د نورو هېوادونو له مشرانو وغوښتل چې "د اوربند د ترلاسه کولو لپاره د خپل توان له ټولو امکاناتو کار واخلي."

د نړۍ له مشرانو څخه د دغو سازمانونو دا غوښتنه د غزې لپاره د نړیوال بشردوستانه کنفرانس له جوړیدو یوه ورځ وړاندې کیږي. فرانسه د دې کنفرانس کوربه توب کوي.

د دغو بنسټونو په ګډه اعلامیه کې ویل شوي چې په نورو لومړیتوبونو کې باید "د ملکي یرغمل شویو کسانو د خلاصون لپاره جدي اقدامات، د ملکي وګړو خوندیتوب، غزې ته د بشري مرستو د رسولو تضمین او نړیوال بشري قانون ته درناوی وشي."

د لوږې په وړاندې د عمل سازمان، د ناروې د مهاجرینو شورا او د بشري حقونو نړیوال فدراسیون هم د دې اعلامیې لاسلیک کوونکي دي.

د ناروې د کډوالو د شورا مشر ین ایګلنډ په دې اعلان کې ویلي دي: "مونږ په زیاتیدونکي توګه د خپلو بشردوستانه همکارانو څخه د ملکي وګړو د ساتنې او د محاصره شوي غزې تړانګې لپاره د بشردوستانه مرستو لپاره ناهیلې کوونکې غوښتنې ترلاسه کوو."

ایګلنډ وویل: "دا د منلو وړ نه ده چې تر اوسه پورې هیڅ بشردوستانه اوربند نه دی نافذ شوی، هیڅ بشري دهلیز ندی رامینځته شوی او د محاصرې د پای ته رسولو لپاره کومه هڅه نه ده شوې."

دا بشردوستانه کنفرانس د پنجشنبې په ورځ د فرانسې په پاریس کې د پاریس د سولې د کلنۍ غونډې په څنډه کې جوړیږي. د ولسمشر مکرون د یو سلاکار په وینا، "د دې هدف د غزې د خلکو اړتیاوو ته د ځواب ویلو لپاره د ټولو شریکانو هڅول دي."

د فرانسې د ولسمشرۍ دفتر ویلي دي چې په دې کنفرانس کې به د اسرائیل هیڅ استازی ګډون نه کوي، خو د هغې پایلې به د اسرائیل له صدراعظم بنیامین نتنیاهو سره مطرح کړي.

وروسته له هغه چې د حماس ډلې د اکټوبر په اوومه پر اسرائیل برید وکړ او د اسرائیلي چارواکو په وینا تر ۱۴۰۰ ډېر کسان یې ووژل او د بهرنیو اتباعو په ګډون یې شاوخوا ۲۴۰ تنه یرغمل کړل، اسرائیلي پوځ د غزې تړانګه په تړانګه هوايي او ځمکني بریدونه کړي دي.

د غزې د روغتیا وزارت چې د حماس تر ولکې لاندې دی، د اسرائیل د بریدونو په پایله کې د ۴۰۰۰ ماشومانو په ګډون د ۱۰۶۰۰ فلسطینیانو د وژل کېدو خبر ورکړی دی. خو تر اوسه کومې ادارې په خپلواکه توګه په غزه کې د تلفاتو شمېر نه دی تائید کړی.

په ورته وخت کې، د نړۍ د اوو سترو اقتصادونو جي-۷ د بهرنیو چارو وزیرانو د چهارشنبې په ورځ د غزې لپاره په جګړه کې "د وقفې او د بشري دهلیز د جوړولو" غوښتنه وکړه، خو دې ډلې د اوربند د ټینګولو غوښتنه ونه کړه.

د اسرائیل صدراعظم د سه شنبې په ورځ وویل چې اسرائیلي ځواکونو د غزې د ښار زړه محاصره کړی دی. هغه وویل تر څو چې حماس ډله یرغمل شوي کسان خوشې نه کړي، هیڅ ډول اوربند او یا غزې ته به د تیلو او ګازو انتقال ترسره نه شي.