اېمنېسټي انټرنېشنل: پاکستان دې په ملکي کسانو په پوځي عدالتونو کې مقدمې نه چلوي
د انساني حقونو نړیوالې ادارې د پاکستان پوځ په دې اراده تشویش څرګند کړی چې په هېواد کې د ورستیو احتجاجونو په مهال په پوځي ودانیو او اسانتیاو حملو کې په ککړو کسانو به پوځ د قانون دلاندې مقدمې چلول کېږي.
د جنوبي اېشیا دپاره د اېمنېسټي انټرنېشنل چارواکي دېنوشيکا دېسنیاکی وویل پوځي قانون دلاندې مقدمو دپاره به پوځي عدالتونه جوړيږي خو په پوځي عدالتونو کې د ملکي کسانو مقدمې د نړیوال قانون خلاف ورزي ده.
د پاکستان پوځ د ګل، دوشنبې، په ورځ وویل په تېرو څو ورځو کې د مظاهرو په مهال په پوځي ودانیو حملو کې د ککړو کسانو خلاف به د پوځ او د جاسوسۍ د قانون دلاندې مقدمې چلولو کېږي.
د نهې، سه شنبې، په ورځ د وزیراعظم شهبازشریف په مشرۍ کې د نېشنل سیکورټي کمېټۍ غونډه وشوه.
د غونډې په اړه سرکاري بیان وویل چې د می په نهمه نېته عمران خان د ګرفتارۍ خلاف د احتجاجونو منصوبه سازان، راپارونکي او د شرخوښو خلاف به د پاکستان ارمي اېکټ او د افیشل سيکرټ اېکټ د لاندې مقدمې چلول کېږي.
بیان وویل په پوځي تنصیبات حمله کونکو سره به هېڅ ډول ریاعت نشي کولی.
اېمنېسټي انټرنېشنل وویل د پاکستان په پوځي عدالتونو کې د ملکي کسانو د مقدمو سره تړلي د انساني حقونو د سرغړونو فهرست لري چې په کې د شفافیت نشت والی، په زور اعترافي بیانونه، د خلکو تېزندي کېدل او د غیر منصفانه مقدمې شاملې دي.
پاکستان په تېرو وختونو کې هم پوځي عدالتونه جوړ کړي دي.
اېمنېسټي انټرنېشنل وویل په پوځي عدالتونو کې د ملکي کسانو مقدمې چلول خلکو د ویرولو یوه حربه ده او مقصد يې د یوې داسې ادارې دلاسه د مخالفت چقول دي چې هېڅ کله يې هم احتساب نه دی شوی.
د انساني حقونو ادارې زیاته کړه چې د پاکستان عام قوانین داسې مادې لري چې دلاندې يې ملکي اثاثو ته په نقصان رسوولو او ويجاړولو کې په ککړو کسانو مقدمې چلېدلی شي او د پوځي عدالتونو جوړېدل هېڅ جواز نه لري.
د اېمنېسټي انټرنېشنل دېسنیاکی په یو بیان کې وویل پاکستان د شهري او د سیاسي حقونو په اړه هغه قانون دستخط کړی چې خلکو ته د قانون دلاندې د منصفانه، ازاد او د بې طرفه مقدمې ضمانت ورکوي.
د پخواني وزیراعظم خان د ګرفتارۍ خلاف په پاکستان کې مظاهرې راپارېدلې وې چې په مهال يې په پېښور کې د رېډیو پاکستان د ودانۍ په شمول په لاهور کې د کور کمانډر په کور او د ملک په نورو برخو کې په پوځي ودانیو او اسانتیاو حملې شوي، اورونه لګول شوي او اثاثې ماتې ګوډي شوې.
د ګل، دوشنبې، په ورځ پاکستان د پوځ مشر جنرل عاصم منیر په مشرۍ کې د کورکمانډرانو غونډه وشوه. د ناستې په اړه د ايي اېس پي ار بیان وویل غونډې ته وویل شوو چې د مربوطې منصوبې دلاندې د اور لګولو، د شهیدانو د تصویرانو او د یادګارونو د بې حرمتۍ، د تاریخي ودانیو د سوزولو او د پوځي تنصیباتو ماتېدل وشول چې اداره یو خاص ردعمل ته راوپاروي.
په بیان کې د کومې ډلې، ګوند او یا د کوم تن نوم نه دی اخیستل شوی.
د پاکستان د پوځ مشر جنرل عاصم منیر د ګل، دوشنبې، په ورځ د کور کمانډرانو د خصوصي غونډې مشري وکړه.
د ناستې په اړه پوځ په خپل بیان کې وویل چې عمران خان د ګرفتارۍ خلاف د مظاهرو په مهال په پوځي ودانیو حملو کې ککړو کسانو خلاف به د پوځ او د جاسوسۍ د قانون دلاندې مقدمې چلولو کېږي.
د کورکمانډرانو د ناستې په اړه د ايي اېس پي ار بیان وویل غونډې ته وویل شوو چې د مربوطې منصوبې دلاندې د اور لګولو، د شهیدانو د تصویرانو او د یادګارونو د بې حرمتۍ، د تاریخي ودانیو د سوزولو او د پوځي تنصیباتو ماتېدل وشول چې اداره یو خاص ردعمل ته راوپاروي.
پوځ د کوم تن یا د کومې ډلې نوم نه دی اخیستی.
هم د ګل، دوشنبې، په ورځ عمران خان په یو وډیو پېغام کې وویل په مظاهرو کې د تشدد په اړه یوه اړخیزه بیانیه کردش کوي، په احتجاجونو کې شر خوښي ورګډ کړی شوي وو او دا چې په دې اړه دې تحقیقات وکړی شي.
