هوايي برید سوریه کې ۳۳ ترکي سرتیري وژلي
لوړپوړو ترکي چارواکو ویلي چې د سوریې په ادلب کې د سوریې د "رژیم ځواکونو" په هوايي برید کې لږ تر لږه ۳۳ ترکي سرتیري وژل شوي دي.
د ترکیې د هتای ولایت والي رحیم دوګان ویلي، پېښه په ادلب کې شوې او ډېری سرتیري هملته وژل شوي دي.
ځینې رپوټونه بیا د وژل شویو شمېر لوړ بولي. ترکیه اوس د سوریې د حکومتي ځواکونو په نښه کولو سره دې برید ته غبرګون ښيي.
- ترکیه کې واورې ښوېدنې لسګونه کسان وژلي
- ترکیه کې زورورې زلزلې مرګژوبله اړولې
- ترکیه کې تېر کال نږدې دوه لکه افغان کډوال نیول شوي
رپوټونه وايي چې دې هېواد د سوري ځواکونو پر ځینونو هدفونو بریدونه کړي دي.
ترکي ځواکونو پر سوریايي هدفونو له هغې وروسته بریدونه پیل کړي چې د ترکيې ولسمشر رجب طیب اردوغان له لوړپوړو امنیتي چارواکو سره په دې تړاو بېړنۍ غونډه وکړه.
د سوریې ځواکونه چې د روسیې ملاتړ لري، هڅه کوي چې ادلب ښار له هغو وسله والو ونیسي چې د ترکیې ملاتړ لري.
تر اوسه د برید په تړاو سوري چارواکو څه نه دي ویلي.
د ترکیې ولسمشر غواړي د سوریې حکومتي ځواکونه دې له هغو سیمو په شاه شي چې ترکیې هلته د څار پوستې جوړې کړې او په دې تړاو یې ګواښ کړی و چې که سوریايي ځواکونه دې سیمو ته خپل پرمختګ ونه دروي، بریدونه به پرې وکړي.
خو د سوریې حکومت او روسیې دا غوښتنه رد کړې او ترکیه یې په دې تورنه کړې چې د ۲۰۱۸ اوربند له اصولو یې سرغړونه کړې او وسله والو ته یې درنې وسلې ورکړي.