وطن پال او نور ګټور شعرونه

په وطن چلېږي راج د پردو خلكو

Jalazai
24.10.2004

په خپل كور كې مو رواج د پردو خلكو
په وطن چلېږي راج د پردو خلكو
په خوارۍ كې د خانۍ كوو خويونه
په هستۍ كې د يو محتاج د پردو خلكو
دسرتېرو په سر خول د پردو ايښى
د ملا په سر مو پاج د پردو خلكو
د ياغي په سر مو زغره د پردو ده
د امير په سر مو تاج د پردو خلكو
پردي خلك مو د رنځ په شاني سكوڼي
نه پوهېږو په علاج د پردو خلكو
اي قراره دلته سر سړى هغه دى
چې بلد وي په مزاج د پردو خلكو