نړيوال ښکيلاک او د لرو بر افغان دازادۍ غورځنګ

طالبانو د استاد یاسر شهادت تایيد کړه

مساپر
07.05.2012

وسله والو طالبانو د یو بل مهم مشر د شهادت خبر تائيد کړ، دغه کس استاد یاسر نومیږي او د طالبانو په لیکو کې يې د پام وړ اهمیت درلود.

ترلاسه شوي راپورونه وايي، چې استاد یاسر له تیرو څو کلونو راهیسې زمونږ د هېواد د دښمنانو سره بندي وو، خو دا لا نه ده څرګنده چې کله او څنګه وژل شوی.

د وسله والو طالبانو ډلې یوه نامتو قومندان چې نه يې غوښتل نوم يې واخیستل شي له رسنیوسره په خبرو کې د یاسر مړینه تائید کړې، خو په عین حال کې يې په کوټه کې د دې ډلې د نظامي شورا د مرستیال په ګډون د پينځه ویشتو نورو مهمو طالبانو د وژل کیدا راپور په کلکه رد کړ.

یاسر په پلچرخې کې تر یوې مودې بند تیرولو وروسته په ۲۰۰۷ کال کې د ایټالوي ژورنالیست سره تبادله شو.

طالبانو دغه ايټالوی ژورنالیست خوشې، خو د هغه افغان ژباړن اجمل نقشبندي او موټر چلوونکی يې ووژل.

استاد یاسر څلورم طالب مشر دی چې په مرموز ډول زمونږ د خاورې او ملت د دښمنانوله خوا وژل کیږي.

له دې وړاندې د دې ډلې د واکمنۍ پر مهال د ملي دفاع وزیر ملا عبید الله، قاري یحې هجرت، ملا برادر او ځينې نور طالبان په ورته ډول نیول او یاهم وژل شوي.