نړيوال ښکيلاک او د لرو بر افغان دازادۍ غورځنګ

دافغانانو د بې وزلۍ لاملونه

hewad
26.06.2009

ګرانو هېوادوالو سلامونه مې ومنئ٠
د دې سکالو پۀ اړه تاسو څۀ نظر لرئ٠

دافغانانو د بې وزلۍ لاملونه

د افغانانو د بې وزلۍ لاملونه ډېر دي٠ زۀ دلته د هغو لاملونو يادونه کوم چې رېښې يې زموږ لۀ کلچر او دودونو چينه اخلي٠

لۀ يوې لورې دېرش کلنې غميزې زموږ ژوند تريخ کړی دئ ، لۀ بلې لورې داسې دودونه (رواجونه) لرو چې زموږ د ولس پۀ بې وزلۍ کې ستره ونډه لري٠

کۀ چېرې خپل ورځني ژوند ته پام وکړو نو ډيرې داسې چارې تر سترګو کېږي چې زموږ د ژوند د خرابېدو اصلي لاملونه دي٠ د بېلګې پۀ توګه کۀ د وادۀ او ورسره د اړوندو دودونو لګښتونو ته ځير شو لۀ ورايه وينو چې دا زموږ پۀ بې وزلۍ کې څومره ونډه لري٠ زۀ بۀ د يوۀ وادۀ او اړونده لګښتونو يوه لنډه يادونه وکړم٠

د هر څۀ ترمخه د رويبارۍ (خواستګارۍ) پړاو دئ، کله چې دواړه خواوې سره جوړې شي يو کوچنی ګل ورکول کېږي چې د دې لپاره يو کوچنی محفل جوړېږي ورپسې د کوزدې (شيرينخورۍ) محفل دئ٠ وروسته لۀ دې د نکريزو شپه ورپسې وادۀدئ٠ لۀ وادۀ وروسته تخت جمعي، شاه سلامي او د پايوازي محفلونه دي چې پر دې محفلونو پۀ سلګونه زره افغانۍ لګښتونه راځي٠

ودونه او اړونده نور محفلونه يې اوس د پخوا پۀ شان نه بلکې پۀ ډېر اصرافانه توګه تر سره کېږي چې زښت زيات لګښتونه غواړي٠ د دې لګښتونو سربېره د ولور ،خلعتونو او همدا شان د کوزده توب پۀ پړاو کې د نوي کال ، اخترونو او پۀ داسې نورو ورځو کې د ناوې (کوزدې) کورته جوړې وروړل، ټول هغه لګښتونه دي چې ټول افغانان يې بې وزله او غريب کړي دي٠ کۀ چېرې دا لګښتونه نۀ وي افغانان کولای شي پۀ دې پيسو باندې ځان ته ښۀ ژوند جوړ کړي٠

همدا ډول دا هم اوس دود ګرځېدلی دئ چې کۀ ښځې (نجونې) يوۀ محفل کې يو ځل يوه جوړه کالي واغوندي هغه کالي بيا بل محفل کې نۀ اغوندي٠ ځينې خو پۀ يوۀ محفل کې څو جوړې کالي اغوندي٠

بل د پرتمينې مېلمستيا دود دئ چې افغانان يې د نوې وادۀ شوې جوړې لپاره جوړوي چې زښت زيات لګښت پۀ کې کوي٠ ډېر داسې خلک شته چې خپلو ماشومانو ته د سهار او ماښام ډوډۍ نشي برابرولای اما د سيالۍ پۀ خاطر دا ډول مېلمستياوې جوړوي٠

زما پر اند زموږ د ټولنې ډېرې ناخوالې د دا ډول دودونو زېږنده دي٠ زموږ د ټولنې غوڅ ډېرکی د دې لګښتونو وس نلري، د دې لپاره چې دا لګښتونه پوره کړي اوږدې مسافرۍ، غلا، بډې اخستلو او داسې نور غيرمجاز کارونو ته مخ اړوي٠ پۀ لنډه توګه ويلای شم چې د همدې بېځايه دودونو لۀ کبله زموږ پۀ ټولنه کې اخلاقي انحراف، فساد او بې امني رامنځ ته شوېده٠

هيله ده چې افغانان د خپل ژوند د ښۀ کېدو لپاره لۀ بېځايه لګښتونو او دودونو نه لاس پر سر شي٠

پۀ درنښت

سيدشېراحمد لمر

رښتینی
17.07.2009

http://www.tolafghan.com/forum/viewtopic.php?t=3054&postdays=0&postorder=asc&start=90

هیواد صیب ستاسو دموضوع دتایید له پاره می دا ارټیکل
مناسب وباله خو متاسفانه چی موږ خپلو اقتصادی ستونزو
ته پام نلرو بس دسیاسی موضوعات عاشقان یا مدمنان یو

اوداځکه موټولی ویجاړی د ی

رښتینی
17.07.2009

داډول لګښت

د یوه ملاصیب کیسه ده چی په یوه تصنیفی اداره کی یی کار کاوی ده ډیر ساده ژوند تیراوه او ډیره محدوده تنخوا یی لرله خو له دی کمي تنخوا نه به یی هم یو څو روپۍ بچت کیښودلی ده یواځی یوه لور لرله او هغه یی هم واده کړه خو په واده کی یی په لور باندی یوه روپۍ هم ونه لګوله بس کوم ځوان ته یی چی لور کوژده کړی وه هغه یی را وغوښت ، نکاح یی وتړله او دواړه یی رخصت کړل خو درخصت کولو په مهال یی خپلی لور او زوم ته یو چیک ورکړ او دا دلسو زرو روپیو چیک و او دوی دواړوته یی وویل : دا لس زره روپۍ زما د ټول ژوند پانګه ده چی په بانک کی می جمعه کړی وه ما کولی شوی چی دا روپۍ می ستاسو د واده په سامان او نورو مصرفونو کی لګولی وی خو هغه کار ماته خوند نه راکاوه ما دا ښه وبلله چی دا لس زره روپۍ تاسو ته نغدی درکړم تاسو دا روپۍ واخلئ او خپل ژوند پری برابر کړئ !

د ملا صیب لور او زوم یی په خپلو کی مشوره وکړه او دا یی ښه وبلله چی په دی روپیو ځان ته کاروبار پیل کړی او همداسی یی وکړل په پیل کی هغوی ډیری ستونزی وګاللی ځینی وختونه له سختو حالاتو سره مخامخ کیدل خو خپل کاروبار یی په زړه ورتوب سره روان لاره بلاخر حالات بدل شول په دی لسو زرو روپیو کی برکت ولویده او دی خلکو څو کاله وروسته ښه ترقی وکړه اوس هغه دواړه ډیرد عزت او خوند ژوند تیروی .

واده د انسان په ژوند کی یو خورا مهم بدلون ده او دا کار خورا زیاتی بیداری ته اړتیا لری د واده ورځ د تش شور او غوغا ورځ نه ده بلکی دا هغه ورځ ده چی باید دیوه لوی مسؤلیت احساس په ځان کی پیدا کړل شی په دی ورځ میړه او اورته دټول ژوند په ګډه تیرولو معاهده سره لاس لیک کوی دی درانه مسؤلیت ته دلومړی ځل غاړی کیښودلو لومړۍ ورځ دا غوښتنه کوی چی باید دواده مراسم ساده او له تکلفاتو پاک وی او له هرډول بیځایه لګښتونونه باید ډډه وشی او که څوک د کوم ضروری لګښت نیت لری هغه یی باید په داسی غوره او معقوله توګه وکړی دهغه له پاره ددی ملا صیب بیلګه تر ټولو غوره بیلګه ده

که موږ په خپل منځ کی دا ډول ودونه رواج کړو نو ودونه به مو د ملی تعمیر د پروګرام یوه مهمه برخه وګرځی او په هر کور کی به په پټه توګه د پرمختګ لړۍ پیل شی د ملت په سلهاو میلیونه روپۍ (چی د یو د وو ورځو په تشو تماشو او بیځایه مزو چړچو کی ضایع کیږی ) به د ملت د ودانی له پاره یوه مهمه زریعه وګرځی او د ملی اقتصاد دپلانونو مهمه برخه به وګرځی دملی ودی بهیر به ورسره ګړندۍ شی او دا ګټه بلکل یو غنیمت ده ځکه په دی سره به د ډیر و شتمنیو د ضیاع مخه و نیول شی او په رغوونکو لارو چارو کی به وکارول شی
_________________