سياست او روانې چارې

د مرتجع او روشنفکره طالبانو کشمکش - لمړۍ برخه

میرویس
06.05.2014

د فورم ډیرو ویاړلو او پتمنو شریکباڼو، السلام علیکم
پخواني شوروي اتحاد چې د افغان مجاهد ولس په لاس ننګینه ماتې وخوړله، بیا پخپله افغان مجاهدینو د قدرت په سر په خپلمنځي جګړو کې د شوروي د مظالمو نه زیات افغان ولس ځوراوه.

ددې ناروا جګړو د ختمولو دپاره د طالبانو تحریک ظهور وکړ. د طالبانو د تحریک د تومنې د القاع دلمړنیو شیبو نه پدې تحریک کې د روشنفکره، پراخ نظره او معتصبو او کوتاه نظره طالبانو تر منځ خود په خود پولې او مرزونه را وټوکیدل.

د روشنفکره طالبانو په سرکې مجاهد ملا محمد عمرآخند او د متعصبو طالبانو په سر کې د کابل والي ملا رباني چې د پاکستان په سفر کې دپاکستان د ملي سرود د غږولو په وخت کې دنور مجلس سره جګ نشو ځکه چې موزیک حرام دئ، واقع وو.

د وخت په تیریدو د طالبانو تحریک ډیرې لوړې ژورې ولیدلې، روشنفکران نور هم روښانه او جهان دیده شول، او کوتاه نظره معتصبان د القاعدئ عقیدوي پیروان شول او د نورو خارجي ترورستانو ترنفوذ او اثر لاندې د ارتجاع حد ته ورسیدل او مرتجعین شول.

مرتجعین یا د حقایقو نه منکران ولو که د بدلون په حقانیت پوه هم وي هیڅ ډول داسې مؤجه او روا بدلون ته غاړه نږدي چې ددوی منافعو ته تاون پکې اوړي. ښه مثال یې د یوه ذغال فروش دئ چې په ژمي کې یې کاروبار چوک وي، نو د پسرلي او دوبي په راتلو يې خوا بدیږي، او که یې د وسه وشي، نو د ژمي د تیریدو او پسرلي د راتګ مخه به ونیسي.

د طالبانو دغه متعصبه او تنګ نظره ډله هم ذغال فروش غوندې کوښښ کوي چې د طالبانو د تحریک د صلحې د جریان چې د پسرلي راتګ غوندې، د وخت او زمان تقاضا ده مخه ونیسي، ترڅو خپلې ګټې چې د نورو د مرګ او ملک په تباهۍ کې یې لتوې ادامه پیدا کړي او امرار حیات وکړي.

ددې لړۍ دویمه برخه لا په زړه پورې ده.