نړيوال ښکيلاک او د لرو بر افغان دازادۍ غورځنګ

پاکستان ملا عبدالغني برادر سعودي یا ترکیې ته سپاري

میرویس
10.09.2013

ډیرو محترمو لوستونکو، الله مو نیکمرغه لره.
پاکستاني چارواکو ویلي چې د پاکستان، افغانستان، سعودي عربستان او ترکیې ترمنځ د ملابرادر د خوشي کېدو او د سولې د بهیر د راتلونکي پړاو په اړه خبرې روانې دي.
که د ملا عبدالغني برادر په حصه کې روانې خبرې اترې نتیجه ورکړې، هغه سعودي عربستان او یا ترکيې ولیږل شي، کیدای شي د کړیدلي افغان ولس د نیمه خواه هیلو په پوره کیدو کې مرسته وکړي.
داسې ویل کیږي چې ملا عبدالغني چې د ملا محمد عمر آخند مرستیال ؤ، یو میانه روه سړئ دئ. که ملا برادر میانه روه وی، نو خامخا ملا محمد عمر هم میانه رو سړئ دئ.

د ملا محمد عمر آخند زوم او دطالبانو د امارت د وخت د مالیي وزیر ملا معتصم آغا جان هم ویلي وو چې ملا محمد عمر آخند یو میانه رو طالب مشر دئ.

که ملا برادر سعودي عربسان ته ولیږل شي، خامخا به د افغانستان د سولې پروسه چټکه کړي، خو که ترکيې ته واستول شي، نو هلته به د طالبانو د بل میانه رو مشر ملا معتصم آغا جان سره يو ځای شي او د میانه روانو پره به نوره هم پیاوړې شي، او د سولې د روانو چهلو ځلو سره به لازیاته مرسته وکړي.
دا لاندې خبر تاند خپور کړیدئ:
=======
پاکستان ملا عبدالغني برادر سعودي یا ترکیې ته سپاري
• Monday, 9 September 2013 17:50
• لیکنه: تاند
• خپروونکی: تاند http://taand.com
تاند- پاکستاني رسنیو نن د دغه هیواد د چارواکو په قول وویل چې دا هیواد غواړي د طالبانو دوهم کس ملا عبدالغني برادر سعودي عربستان یا ترکیې ته ولېږي.
پاکستان دا اعلان وروسته له دې وکړ چې د افغانستان ولسمشر حامد کرزي په اسلام اباد کې له پاکستاني چارواکو سره د افغانستان د سولې د بهیر او د طالب بندیانو د خوشي کېدو په اړه خبرې وکړې.
د شنبې په ورځ پاکستان اووه بندي طالبان خوشي کړل خو د پاکستان دا اقدام د افغانستان له چندان هرکلي سره مخامخ نه شو ځکه چې په خوشي شویو کسانو کې هغه عناصر شامل نه ول چې د افغانستان حکومت یې د خلاصون غوښتونکی دی.
پاکستاني چارواکو ویلي چې د پاکستان، افغانستان، سعودي عربستان او ترکیې ترمنځ د ملابرادر د خوشي کېدو او د سولې د بهیر د راتلونکي پړاو په اړه خبرې روانې دي.
د پاکستان له لوري ترکیې او یا سعودي عربستان ته د ملابرادر سپارل دا احتمال پیاوړی کوي چې د قطر پر ځای به د سولې بهیر او د طالبانو دفتر په سعودي یا ترکیه کې پرانستل شي.
د پاکستان حکومت د افغانستان د سولې بهیر ته خوشبیني ښکاره کړه، ویې ویل، دا اقدام به یقیناً د سولې په خبرو کې مخ په وړاندې حرکت راولي.
تراوسه پوري څرګنده نه ده چې کوم شی سبب شوی چې پاکستان یې د ملابرادر خوشي کولو او د افغانستان د سولې له پروسې سره مرستې کولو ته هڅولی دی.
سره له دې چې پاکستان ته د افغانستان د ولسمشر د وروستي سفر د پایلو په وړاندې ډېرو کتونکو منفي نظر ورکړی خو ځیني نښې نښانې ښيي چې د نوازشریف حکومت لکه چې د افغانستان په وړاندې د پاکستان دودیز سیاست بدلوي.
ویل کېږي چې ملابرادر د افغانستان له حکومت او ملګروملتو سره د سولې د خبرو لپاره پټ تماسونه نیولي ول او په همدې خاطر د پاکستان د استخباراتو له لوري څو کاله پخوا په کراچۍ کې ونیول شو.