يو شمېر روڼ اندي وېره لري، چې که د افغانستان دولت او نړېوال په پاکستان دپلوماتيک فشار وانچوي او کورنيو کړکېچونو ته د هواري لار و نه لټوي؛ نو لرې نه ده، چې ناټو او افغان دولت به د طالبانو او نورو مرورو بريدونو ته ورغاړې و ځي. دا لا نه ده معلومه، چې د پهلوانۍ د روانو او راروانو سياليو ګټونکي به څوک وي؛ خو دا په ډاګه شوې، چې وړ کسانو ته د دولت واګي په لاس نه دي ورغلي، ځکه په يو شمېر ځايي چارواکيو شکونه کېږي، چې د سيمې ګډوډۍ سره خپلې ګټې تړلې بولي. ښه داوه، چې هېڅوک تر قانون پورته نه واى ګڼل شوى؛ خو داسې ونه شوه او په تېرو پنځو کلونو کې دا معلومه نه شوه، چې د ګډوډۍ لامل څه کېداى شي.؟ زموږ په اند اوسمهال په سيمه کې ښکېل قدرتونه د ګټو په سر ناندريو ته نېږدې شوي او که د نړېوالو مطبوعاتو خولې همداسې بېرته وي؛ نو ډېر ژر به د راز او پردې هغه خبرې بربنډې شي، چې روڼ اندي يې په اړه يوه خوله نه دي. د ځينو جهادي مشرانو، يو شمېر تکنوکراتانو او د نړېوالو په شريکو منډو رامنځته شوې ديموکراسي د هېواد په مرکز او لرې پرتو سيمو کې د مرګ سلګيو ته نېږدې شوې، ځکه د روانې ديموکراسۍ په پېړ کتاب کې د افغان اولس د روښانه راتلونکي فال نه ترسترګوکېږي. . په ادارو کې سمون د حاکمې طبقې له وسه پورته دى او وجه يې دا ده، چې د اداري جوړښت او ځينو نورو ستونزو لپاره ځانګړې مرستې، په موټرو، لوکسو هوټلونو او په يو شمېر داسې لارو روانې دي، چې ستونزې يې څو چنده نورې پسې زياتې کړي. د دولت او خلکو ترمنځ غځېدلې لارې نورې هم له اغزيو ډکې شوي او لرې نه ده، چې د اولس او حکومت ترمنځ غځيدلي لينونه ( مطبوعات ) هم وشلېږي. په دې وروستيو کې د پاکستان نامتو مشرانو ناټو ته ګواښ کړى، چې که افغان دولت طالبانو ته په چارو کې ونډه ور نه کړي؛ نو ترخه ماتې به و خوري، مګر زموږ خارجه وزير دا احتمالي ماتې نه ده منلې او د پاکستانيو چارواکيو خوب يې بل ډول تعبير کړى. بوش د ناټو په هغو غړو هېوادونو غږ کړى، چې افغانستان ته يې په ځواکونو پابندي لګولې، هغه ويلي، چې افغانستان ته د ځواکونو په لېږلو کې بايد ناغېړي و نه شي. خير ريښتيا کردار څرګندېږي، اوس بايد دولت مورال و نه بايلي او پاکستان، امريکا او نورو نړېوالو سره دې په ګډه د ستونزو حل را اوباسي. نور بايد چارواکي يواځې خپلو ګټو ته ونه ګوري، ځکه د حالاتو په خرابېدو دا هم په خطر کې لوېږي، که څه هم په دې وروستيو کې د لويو مدرسو جوړولو او مامورينو ته د معاشونو لوړېدو ډنډورې وهل کېږي، چې د يو شمېر خلکو لپاره ښه زيرى دى؛ خو يواځې جنګ او شعارونه د بحران د حل لاره نه ده، ته ګوره، چې د افغانستان او پاکستان د ګډې جرګې خبرې به په کوم مدار و څرخېږي. اداره