دروند او په خپلی مورنۍ ژبی پښتو سپيڅلی مېن شيرزاد کامول صيب!
تر هر څه د مخه د ټول افغان د پنځمی کاليزې مبارکۍ تاسو دټول افغان يب ماسټر او ستاسو د ټيم همکارانوهر يو مجيب انګار ، زمه وال ، بوريوال کاکړ ، وحيد افغان ، سپين غر ، غمی او نور و هغو کسانو ته چې اوس يې نوم زما په ذهن کې نه شته او د ټول افغان سره د زړه له تله همکاري لري وړاندې کوم . ځکه د همدغو خبريالانو د هڅو او هاند برکت دی چې موږ يې تل په نړۍ او هيواد کې د نوو او تازه پيښو خبر کړي يو . اميد دی چې د ( ټول افغان ) عمر به تل همداسې اوږد او ښيرازه وي .
کاموال ستاسو سپيڅلی خدمت د لمر په څير هر چاته معلوم دی ، که له يوې خوا مو د ټول افغان په څير علمي . کلتوري ، ټولنيزه ، سياسي ويب پاڼه د نيټ په نړيوال کلي کې و ځلوله نو د بلې خوا همدا تاسو وی چې د( خپلې پښتو ) ويبپاڼې نه وروسته مو د ( ټول افغان ) له لارې په کمپيوټر کې د پښتو سپوټ په وړيا توګه د هيوادوالو په واک کې ورکړ. په داسې حال کې چې له تاسو نه پخوا همدغه پښتو سپوټ په زرګونو کلدارو او په سلګونو ډالرو پښتو ته د خدمت په نامه خرڅيده چې ډير ځل به د ستونزو او مشکلاتو سره هم مل و .
د ټول افغان د فورم د برخې په اړه ځنو دوستانو خپل نظرونه ورکړي دي زه ورته په احترام لرم خو په دې اړه زما شخصي نظر دادی ، هر څومره چه په دې فورم واکمني او سانسور کميږي همغومره به ګټور وي . ځکه د روان شناسۍ د علومو له پلوه ډير ځلې په زړونو کې پرتې خبرې چې د ويلو او ليکلو زمينه ورته نه وي برابره بلاخيره په سترو غٌقدو بدليږي چې پايلې يې دسترو جنايتونو زيږنده وي . دوهمه ګټه يې داده چې پښتانه به هم په ځان او په بل دانتقاد دکلچر سره بلد شي . دريمه ګټه يې داده چې ځني هغه په اصطلاح حکومتي لوړ پوړي چارواکي ، او په ټولنه کې سياسي ، فرهنګي او ادبي ما فيايي ټيکه داران چې فکر کوي ډله ايزې رسنۍ او فرهنګي مرکزونه يې په خپل لاس کې دي ، د نه شخصيت نه ستر شخصيت او د سترو شخصيتونو نه واړه جوړولی شي او له ويرې ورباندې هيڅوک نيوکه هم نه شي کولی ، نو ددغسې فورمونو په موجوديت کې به يو څه به په ډار کې وي اوخپل کړه وړه به په حساب کوي .
بايد ووايو چې په انټر نيټ کې د نړۍ ټولو ژبو په ويب پاڼو کې د بحث فورمونه ازاد وي او د هر چا چې هر څه زړه غواړي په ازادانه توګه يې ليکي . خو يوه خبره شته او هغه داده چې د نيټ نړۍ هم ځان ته ځانګړي قوانين لري ، دا قوانين د نړۍ په يو ه پارلمان کې هم نه دي تصويب شوي خو بيا يې هم خلک مني او هغو ته احتام کوي .
اميد دی زموږ هيوادوال به هم دغو قوانينو ته د درناوي په رڼا کې د منظق او استدلال په ژبه خپلې ليکنې وکړي ، نه چاته د ښکنځلو ، سپکو سپورو او يا هم د چا د شخصيت سپکاوی له پاره مټې راونغاړي . سالم انتقاد د سالمې ټولنې د جوړيد لومړنۍ خښته ده موږ بايد ورنه ويره ونه لرو .
په ډير درنښت
ديپلوم انجنير ستانه مير زهير
