شهيد دکتور عبدالعزيز (الرنتيسي) رحمه الله

د حماس د اسلامي گوند دوهم مشر شهيد دوکتور عبدالعزيز (الرنتيسي) رحمه الله ژوند او شهادت
د فلسطين او په فلسطين کې د اسلامي مقاومت زمرى، شهيد دکتور عبدالعزيز علي عبدالحفيظ رنتيسي د حماس د اسلامي غورځنګ دوهم مشر او يو له هغو شپږو کسانو څخه دى چې د حرکة المقاومة الاسلامية (حماس) اسلامي، جهادي او سياسي غورځنګ يې په کال ١٩٨٧ز کې په غزه کې تاسيس کړ.
شهيد رنتيسي په کال 23/10/1947ز کې د يبنا په کلي کې (د يافا او عسقلان ترمنځ) په يوه دينداره او اسلامي اصولو ته پابنده کورنۍ کې زيږيدلى، کورنۍ يې د ١٩٤٨ز کال له جګړې(د ١٩٤٨ز کال جګړه د عربو او اسرائيلو ترمنځ لومړۍ جګړه وه چې ددې جګړې په پاي کې د اسرائيلو په نامه د مسلمانانو په مقدسه ځمکه کې د  يو صهيونستي هيواد بنسټ کيښودل شو) وروسته غزې ته ولاړه او هلته د خان يونس په کيمپ کې ميشت شول، پدې وخت کې د رنتيسي عمر شپږ مياشتې و.
نهه وروڼه او دوه خوندې لري، چې مجموعا يوولس کسيزه کورنۍ يې لرله، د دوي د کورنۍ تعداد ډير و او شرائط سخت، ځکه خو عبدالعزيز رنتيسي خپل د لوبو او د ماشومتوب دوره له مسوليت څخه ډکه تيره کړې او په شپږ کلنۍ کې چې هغه مهال په لومړي ټولګي کې و د کار لپاره له کوره وتى ترڅو له خپلې کورنۍ سره د اقتصادي مشکلاتو په هوارولو کې مرسته وکړي.
شهيد رنتيسي خپلې ابتدائي زده کړې په فلسطيني کمپونو کې د الوکالة الغوث(له مهاجرينو سره د ملګرو ملتونو د مرستو اداره)  ترسره کړ او په کال ١٩٦٥ز کې له ليسي څخه په ممتاز درجې  فارغ شوى او د لوړو زده کړو په موخه د مصر اسکندريې ښار ته تللي او هلته يې د طب په پوهنځۍ کې داخله اخستې، چې په کال ١٩٧٢ز کې د خپلې يوولس کسيزې کورنۍ له مشکلاتو سره، سره په دې ترتيب خپلې زده کړې د طب په پوهنځې کې پاي ته ورسولې، له دي وروسته بيرته غزي ته راغى او دوه کاله وروسته د ماستري په موخه بيرته اسکندريې ته ولاړ او دطب د پوهنځۍ د ماشومانو په څانګه کې يې ماستري ترلاسه کړې، چې په ښو نمبرو له پوهنتون څخه په ممتاز درجه فارغ شوى.
 په همدې کال رنتيسي بيرته غزې ته تللى او د خپل علمي، عملي او مبارزاتي ژوند يې له همدې ځايه شروع کړې او د مظلوم فلسطين په تياره آسمان کې د ځلانده ستوري په څير ځليدلي، چې په کال ١٩٧٦ز کې د غزې د خان يونس په ښار کې د ناصر په روغتون کې د ډاکتر په حيث وظيفه سرته رسولې.
دکتور رنتيسي واده وکړ او شپږ اولادونه يې وزيږيدل چې دوه يې ځامن او څلور يې لوڼې وې.
شهيد رنتيسي خپل ديني او ټولنيز ژوند په لوړ همت پرمخ بوولى، ډيرې لويې وظيفې يې سرته رسولي چې له هغې څخه: د هيئة ادارية في المجمع الاسلامي، الجمعية الطبية العربية بقطاع غزة او الهلال الاحمر الفلسطيني کې يې وظايف په ګوته کولى شو.
شهيد دکتور رنتيسي په کال ١٩٧٨ز کې له نورو ملګرو سره د غزې اسلامي پوهنتون (الجامعة الاسلامية بغزة) بنسټ کيښود او په همدغه پوهنتون کې د استاد په توګه وټاکل شو، چې د ژنتيک علم په اړه او د ماشومانو د طب استادي يې کوله.
شهيد رنتيسي په کال ١٩٧٨ز کې له خپلو نورو شپږرو همفکره اخواني وروڼو سره چې په غزه کې اوسيدل د حرکة المقاومة الاسلامية (حماس) په نامه اسلامي غورځنګ بنسټ هم کيښود، دا هغه سياسي عسکري خوځښت دى چې ترننه پورې د فلسطينيانو د آزادۍ وروستۍ هيله او د داسې پاکو احساساتو پايله ده چې نن ورځ داسې يو خوځښت چې شپږو داسې کسانو چې مشر يې په پښو او په لاسونو شل سړى و بنسټ کيښود، د اسرائيلي ځوکمن دښمن په مقابل کې دريدلۍ او د فلسطينيانو د حق او خپلواکۍ دفاع کوي. شهيد رنتيسي د حماس په غړو او موسسينو کې لومړى کس و چې د صهيونستي ځواکونو له لورې ونيول شو او د زندان تيارو ته وغورځول شو.
مجاهد شهيد رنتيسي څو، څو واري بندي شوي، چې له هغي څخه په کال ١٩٨٣ز کې صهيونستي اشغالګرو او د مدني يهودانو ادارې ته د ماليي په نه ورکولو بندي شو او په کال ١٩٨٨.١.٥ز کې يوځل بيا د يوويشتو ورځو لپاره بندي شو، کله چې صهيونستي ځواکونو غوښتل دده کوټې ته دننه شي، ده ورسره مخالفت او حتې په جګړه شو او بې له دې چې هغوي يې د خوب کوټې ته ننوځې ونيو او زنداني يې کړ.
شهيد رنتيسي د دريم ځل لپاره د کال ١٩٨٨ د فبروري په څلورمه د اسرائيلي يرغلګرو په ضد د ملي پاڅون او هغوي ته د خطر د پيدا کولو په تور د دريم ځل لپاره د دوه نيمو کالو لپاره صهيونيستي زندان ته وغورځول شو، چې بيا د ١٩٩٠ز کال د سبتامبر په څلورمه راخوشي شو. بيا د څلورم وار لپاره صهيونيستي ځواکونو په کال ١٩٩٠ز کې د دسامبر په څوارلسمه ونيو او يوار بيا يې د يو کال لپاره د زندان تيارو ته وغورځاوه.
په کال 17/12/1992ز  له څلورسوه د حماس او د اسلامي جهاد د خوځښت له غړو سره د لبنان جنوب دمرج الزهور منطقې ته تبعيد شو، هلته د لبنان په جنوب کې د تبعيديانو د وياند په توګه يې وظيفه سرته رسوله او د العوده (د لبنان او فلسطين ترمنځ و) په کيمپ کې اوسيدل، چې په صهيونيستي رژيم له ډيرو فشارونو وروسته بيرته غزې ته راوګرځيدل او د تبعيد يو تريخ کال يې په جلا وطنۍ کې تير کړ.
وروسته له دې چې د العوده له کيمپ څخه غزې ته راوګرځيد، صهيونستانو ونيو او په يوه نظامي محکمه کې يې يو وار بيا په زندان محکوم شو، چې د ١٩٩٧ز کال تر نيمايې پورې په زندان کې د سياسي بندي په شکل پاته شو.
په فلسطين کې د حماس لپاره يواځې اسرائيلي دښمن نه و، مګر له اسرائيلو سره، سره د الفتح ګوند چې د ياسر عرفات ګوند و، هم د حماس او نورو فلسطيني جهادي ډلو لپاره يو لوي مشکل و، کله چې ياسر عرفات له اسرائيلو سره د مذاکراتو خبرې پيل کړې، د شهيد رنتيسي له لورې تر سختو نيوکو لاندې راغى، چې د همدغو نيوکو له امله د الفتح ګوند له لورې پنځلس مياشتې بندي شو او هغه وخت له بنده آزاد شو کله چې يې مور  بې بې وفات شوه. په زندان کې هم شهيد رنتيسي آرام پاته نشو، کله چې له الفتح ګوند سره په زندان کې و، د اسرائيلي موشکو له لورې پرې حمله وشوه، خو خداى له مرګه وژغوره او په همدې ترتيب څو وارې الفتح ګوند نيولى او تقريبا اووه ويشت مياشتې د الفتح ګوند په زندان کې پاته شوى، بيا هغه وخت د الفتح له لورې خلاص شوى چې ډوډۍ خوړل يې بند کړي و (اعتصاب غذائي يې کړى و)، له دې وروسته بيا هم د الفتحې گوند ده د نيولو هڅه کړي خو هر وارې ناکامه شوى.
ويل کيږي چې شهيد رنتيسي په کال ١٩٩٠ز کې هغه مهال چې له شيخ ياسين سره يوځاي بندي و، د پاک قرآن حفظ يې پاى ته ورساوه او همالته يې د وطن او مقدسې ځمکې په اړه ځنې شعرونه او قصيدې هم و ويلې او له دې سره يې په لسګونو سياسي مقالې يې مختلفو اخبارونو کې خپرې شوې.
کله چې شهيد احمد ياسين د حماس موسس د الفتح ګوند له زندان څخه په کال ١٩٩٩ز خلاص شو، شهيد رنتيسي د شيخ احمد ياسين نيږدې مشاور ، د حماس وياند او د حماس د ګوند د سياسي څانګې مسول و، په هغه وخت کې شيخ ياسين چې په لاسونو او پښو شل و د حماس د روحاني مشر په حيث دنده سرته رسوله. اسرائيلي حکومت شهيد رنتيسي هغه څوک بللې و چې خپله مستقيما په تروريستي علمياتو کې لاس لري.
په کال ٢٠٠٣ز کې پر شهيد رنتيسي يو وار بيا هغه وخت اسرائيلي الوتکو له لورې حملې پرې وشوې کله چې شهيد رنتيسي د امريکا د سولي له پلان سره مخالفت وښود او په دغه حمله کې شهيد رنتيسي زخمي کړل شو او دوه نيږدې ملګري يې په شهادت ورسيدل، شهيد رنتيسي هغه وخت ويلې و چې اسلحه او مقاومت زموږ د ځمکې د آزادى يواځينۍ لاره ده.
دکتور رنتيسي له ځوانۍ، د تنظيم تر مشرۍ او بيا تر شهادته له اسرائيلي دښمن سره د خبرو اترو او مصالحې کلک مخالف و ،هغه په ځوانۍ کي هم د فتح او اسرائيل تر منځ د مصالحي شديد مخالف وو او د هغوي د مذاکري په ضد يي څو څو واري پارونکي او احساساتي ويناوي وکړي چي د د دي وينا له کبله يي د زندان ترخي شپې او ورځې سبا کړي. کله چې شهيد رنتيسي د حماس د اسلامي غورځنګ مشر وو، په خپلو ويناوو کې له صهيونستي رژيم سره د مذاکرې په اړه په داسې حال کې چې ټوپک يې په لاس يې کې نيولې و داسي وويل: هذا هو الطريق،  يعني دا (کلاشنکوف) د حل لاره ده، هغه دا کلمه (هذا هو الطريق) څو څو واري تکرار کړه او حاضرينو هم ورسره په احساساتو بدرګه کوله.
دکتور رنتيسي له صهيونستي رژيم سره د مصالحي په اړه په خپله يوه وينا کي وويل: زموږ دښمنانو د خبرو وړانديز ډيرځله وکړ، زموږ شهيدانو له هغو سره خبري او مذاکره وکړه، مګر په وينو يې ورسره خبرې وکړې، په خپلې اسلحې يې ورسره خبرې وکړې، په هغه ژبه يې ورسره خبرې وکړې چې دښمن مو پرې ښه پوهيږي او ورسره مناسبې دي، زما درنو وروڼو! ستاسو دښمن له يوې ژبې پرته په بله نه پوهيږي، چې هغه د جګړې ژبه ده.
يو ځل شهيد رنتيسي د ژورنالستانو په ځواب کې داسې تلپاتې خبري وکړې چې ترڅو تاريځ وي دا خبرې به ژوندى وي، هغه وويل:
آيا موږ له وژل کيدو څخه ويريږو؟
وژل کيدل، وژل کيدل دي...
يا د يا د وژل کيدو له لارې يا د سرطان په واسطه
مرګ يو ځل راځي
موږ ټول د خپل ژوند د وروستۍ ورځې د راتلو په انتظار يو
هيڅ څه به هم بدل نشي...
که مرګ په اپاتچي چورلکي وي
يا په قلبي سکتې
مګر زه اپاتچې چورلکې ته په قلبي سکتې ترجيح وکوم...
د ٢٠٠٤ز د مارچ په ٢٤مه کې، وروسته له هغې چې د حماس د ګوند موسس شيخ احمد ياسيين د اسرائيلو له لورې په شهادت ورسول شو، دوه ورځې وروسته شهيد رنتيسي په غزه کې د حماس د عمومي مشر په ځاي کيناست.

جنايتکارو صهيونستانو د امريکا په هراړخيزې مرستي او همکارۍ، د حماس په مقابل کې خپل مقاومت او جګړه سخته کړه او په کال ٢٠٠٤ز د اپريل په ١٧ د مجاهد دکتور رنتيسي موټر يې په اپاچي چورلکو وويشت او دى يې له خپل ځوي او (ساتونکى) سره له ٥٧ کاله مبارزې، دعوت، جهاد او خدمت څخه وروسته  په شهادت ورسيده. ځوۍ يې محمد پينځه ويشت کلن او باډيګارد (ساتونکى) يې ٣٦ کلن نصار چې د غزې د زيتون اوسيدونکى ويل کيږي چې د قدس په وخت ٨:٣٠ بجې وې کله چې شهيد رنتيسي د غزې د ښار په الجلاء کې و، د امريکايې اپاتچي (چورلکو) په واسطه په شهادت ورسيد، په دغه لوي جنايت کې د هغه د ځوي او باډيګارد (ساتونکى) وجوډ ټوټې ټوټې شوى و، خو شهيد رنتيسي په لومړي وخت کې زخمي و خو هغه هم وروسته په شهادت ورسيد هغه د غزې د الشفاء په روغتون کې د سي سي يو ترکوټي هم په زخميي حالت کې ورسول شو،خو څو ساعته وروسته يې د شهادت د جام په څښلو بريالى شو. کله چې عام فلسطينيان د دوکتور رنتيسي له شهادت څخه خبر شول، خپل دوکانونه يې وتړل او کار يې پريښود، د روغتون ترڅنګ راغلل او د صهيونستانو په ضد يې شعارونه ورکول.
شهيد رنتيسي چې څنګه ويلې و، هماغسې الله جل جلاله شهيد کړ، ده ويلې و چې زه اپاتچې باندې وژل کيدو ته ترجيح ورکوم، هماغه و چې الله تعالى خپل آرمان ورورساوه او د خپلو وينو په ارزښت يې دا اسلامي مبارک خوځښت ژوندې او لا پياوړى پريښود. موږ هم الله جل جلاله ته د دعا لپاره لاسونه نيسو او وايو: ته د شهيد رنتيسي لوى آرمان (د اقصى جومات آزادي) ته مسلمانان ورسوي، دده فکر د قيامت تر ورځې ژوندى وساتې او روح يې ښاد لرې. آمين.