پکتيــــــــــا:
ودان افغانستان د ډاکتراشرف غني احمدزي په ملاتړ غونډه وکړه
احمدالله احمدي/ ګردېز
د پکتيا په مرکز او ولسواليو کې د مخکښ نوماند ډاکټر اشرف غني احمدزي په ملاتړ د ودان افغانستان او قومي شورا ګانو غونډې وشوې.
د ودان افغانستان له لوري په مرکز ګردېز کې لومړۍ ولايتي غونډه جوړه شوه چې د دې ګوند مشر محمديار يار ترڅنګ د ولايتي شورا وکيلانو قومي مخورو ځوانانو ګډون کړی و.
د ياد ګوند مشر محمديار ګډونوالو ته وويل، دوئ په دې باوري دي چې د هېواد اوسنيو ناخوالو ته د پای ټکی ايښودلی شي او دا شته ستونزې به يوازې د ډاکتر اشرف غني احمدزي په واکمني کې هواروي.
يار وويل:
له ډاکټر غني سره به په يوځای کار کوي او په هېواد کې شته ستونزو ته به د حل لارې لټوي.
د نوموړي په وينا د ودان افغانستان تګلاره او د ډاکتر اشرف غني احمدزي منشور سره ورته والی لري نو ځکه يې له ياد کانديده ملاتړ کړی دی.
محمديار په خپلو خبرو کې د احمدزي د سيال کانديد په اړه ځينې اندېښنې هم د غونډې له ګډونوالو سره شريکې کړې.
ده زياته کړه، هغه چې وايي، که بريالي نه شي نو په تاوتريخوالي به لاس پورې کړي نو دا د هيواد لپاره خورا زيانمنه مسله ده.
همدارنګه نوموړي د اويايمې لسيزې هغه ناخوالې يادې کړې، که چېرته د ډاکتر اشرف غني سياله ډله واک ته ورسېږي، نو تاريخ تکرارېږي.
په غونډه کې د محمديار يار تر څنګ د ډاکتر اشرف غني احمدزي يو شمېر ملاتړو مخورو، د ولايتي شوراګانو استازو او د پارلمان وکيلانو هم خبرې وکړې.
د دې غونډې په څېر تېره ورځ په څمکنيو ولسوالۍ کې هم يوه پراخه غونډه وشوه چې د څلورو ولسواليو قومي شوراګانو استازو او ځوانانو ګډون پکې کړی وو.
په دغه غونډه کې د ډاکټر اشرف غني پلويانو له خلکو په ټاکنو کې د پراخ ګډون غوښتنه وکړه.
دغه غونډه چې د دې ولايت په څمکنيو ولسوالي کې جوړه شوې وه، د ورڅيرمه ولسواليو پټان،جانيخيلو،او لجه منګل ولسواليو د قومي شورا استازو او ځوانانو هم ګډون کړی وو.
د غونډې ويناوالوپه خلکو غږ وکړ چې ټاکنو کې په پراخ ګډون سره ډاکتر اشرف غني ته بريا ور په برخه کړي.
ګډونوالو وويل:
دا ځل به د سر په قيمت سره په رايه اچونه کې برخه اخلي او په هغو سيمو کې چې وسلوال کسان د ګاونډيو په اشاره خلکو ته خنډونه جوړ کړي، د خلکو د وسلوال پاڅون سره به مخ شي.
په غونډه کې د قطب الدين هلال، سياف او زلمي رسول ملاتړي هم د دوام او بدلون له ډلې سره يو ځای شول.
پکتياوال وسله والو ته خبرداری ورکوي، چې د ټاکنو په ورځ امنيتي خنډونه جوړ نه کړي او وايي د دې تاريخي پړاو لپاره هر پکتياوال د سر په قرباني غواړي رايې ډاکټر اشرف غني ته ورکړي.
