'د لــوحــې تر لـــیرې کېــدابــــه ټولګیــــو ته ولاړ نـــه شــو'

د کلکو امنیتي تدبیرونو په ترڅ کې یو ځل بیا د کابل د ښوونې او روزنې پوهنتون لسګونو محصلینو چې نجونې هم په کې شاملې وې، د دې پوهنتون په دروازه کې اعتراضي غونډه وکړه.

دوی له خبري رسنیو سره د خبرو په ترڅ کې یو ځل بیا پر خپلې پخوانۍ غوښتنې چې هغه د پوهنتون نوم پخپل ځای پریښودل دي، ټینګار وکړ.

''موږ د ښاغلي ولسمشر او نورو اړونده ارګانونو په وړاندې غږ پورته کوو، چې له دې لوحې سره مخالف یو، دا لوحه نه منو ځکه دا په تاریخ کې د یو ناسم څه رواجول دي او د نسلونو ترمنځ جدايي رامنځ ته کوي که زموږ غوښتنه ونه منل شي، نو موږ ملت یو واټونو ته به راووځو.''

درې اوونۍ وړاندې دحامد کرزي د یوه فرمان او وزیرانو شورا د پرېکړې له مخې د کابل د ښوونې او روزنې پوهنتون نوم د سولې د عايی شورا د پخواني مشر برهان الدین رباني په نوم بدل شو.

تېره اوونۍ د محصلینو استازو له حامد کرزي او له هغه وروسته د رباني له زوی او د سولې د عالي شورا له اوسني مشر صلاح الدین رباني سره وکتل.

ددغو محصلینو له ډلې یو هم نصیب الله ذکي و هغه وايي ولسمشر ورسره ژمنه وکړه چې په دې اړه به له صلاح الدین رباني سره خبرې وکړي او ډېر ژر به خپله وروستۍ پرېکړه وکړي.

د کابل د ښوونې او روزنې پوهنتون د نوم د بدلولو له امله د محصلینو د اعتراض له پیله نژدې درې اوونۍ تېرېږي.

دوی وايي په دغه موده کې د دوی په زده کړو کې خنډ او ځنډ رامنځ ته شوي او تصمیم لري تر هغه به خپلو درسي خونو ته لاړ نه شي چې د پوهنتون د نوم نوې لوحه لیرې او د پوهنتون نوم پخپل ځای پاتې شي.

http://www.bbc.co.uk/pashto/afghanistan/2012/10/121006_hh-af-students-demo.shtml

له آزادي او بي بي سي رادیوګانو څخه په مننه