غزل
ستا که زما ده ، ته له خپل زړه نه پوښتنه وکړه
خطا د چا ده ؟ ته له خپل زړه نه پوښتنه وکړه
زه اماده يم ؛خو چې ته سبا منکره نه شې
زما رضا ده ، ته له خپل زړه نه پوښتنه وکړه
دا ته چې ځې او ما د زړه په رنځ اخته پرېږدې
دا نو روا ده ؟ ته له خپل زړه نه پوښتنه وکړه
په يارانه کې څوک د هر دله خبرې نه اوري
دا خو دنيا ده ، ته له خپل زړه نه پوښتنه وکړه
د ملا مه منه ، ملا غريب په څه خبر دی
مينه ګناه ده ؟ ته له خپل زړه نه پوښتنه وکړه
ووايه ځه ! چې بې له تا به زه ژوندی پاتې شم ؟
پرېکړه په تا ده ، ته له خپل زړه نه پوښتنه وکړه
د رڼو اوښکو په ملتيا دا د انکار خبره
ګرانې رښتيا ده ؟ ته له خپل زړه نه پوښتنه وکړه
جلال امرخېل
