زه څوک يم ؟؟؟

څه فکر کوی زه به څوک يم ؟

اتلس کاله کيږي   هره ورځ د عجيبه پيښو په ګرداب کې  ژوند تيروم ،

 - کله ټوپک ته لاس کړم ، ګيټ کش کړم  په يوه شيه کې يو مظلوم په سرو وينو کې ولبوم اوبيا په خپل قتل په ډير غرور کټ کټ وخاندم .

شيبه وروسته د همغه مقتول سرته ته کينم ، ژاړم ، کوکې  وهم او سوې ساندې وايم .

- په يوه شيبه کې ماشوم شم په لومړي ټولګي کې کينم (  ا، ب ، ت ...  ) زده کوم . په بله شيبه کې معلم يم نورو ماشومانو ته سبق زده کوم  .

- په يوه شيبه کې غل شم  غلا کوم ، په بله شيبه کې  ملا شم د جومات د منبر په سر ناست يم ، نورو ته د غلا په اړه وعظ او نصحت کوم.

- په يوه شيبه کې هم پوليس يم هم قاچاقبر

- په يوه شيبه کې هم ناروغ يم ، هم ډاکټر

- په يوه شيبه کې هم پلار يم هم زوي

- په يوه شيبه کې هم دهقان يم  هم د کرنې متخصص

- په يوه شيبه کې هم خان يم هم نوکر

- په يوه شيبه کې  دوه تنه هم په جنګ اچوم او هم يې بيرته  ديو مشر او مصلح په توګه د هغوي ترمنځ روغه جوړه کوم

 - په يوه شيبه کې هم شپون يم په غرو رغونو کې شپيلۍ غږوم  او خپلې ميږې پيايم ،  په يوه شيبه کې بيا وترنر شم ، د ميږو علاج کوم .

- په يوه شيبه کې دبشر حقوق تر پښو لاندې کوم ، په بله شيبه کې د هغو مدافع وکيل يم .

- په يوه شيبه هم ملک يم ، هم ژرنده کړی ، هم خټګر، هم درزي ، هم د کلي دوکاندار ، هم مشتري ....

نو څه فکر کوی چې زه  به څوک يم ؟؟؟؟؟؟؟؟

که تاسو يې په ځواب نه پوهيږی زه به يې درته ووايم . زه ډرامه ليکوال  يم

( نوی کور، نوی ژوند )