پاکستان د بشري حقونو په اړوند د امریکایي کانګریس د غړو اندېښنې رد کړي او وایي د خلکو حقونه خوندي دي
د پاکستان د بهرنیو چارو دفتر د امریکایي کانګریس د غړو لخوا د پاکستان په وروستیو حالاتو ښودل شوې اندېښنې رد کړي اؤ ویلي یې دي چې پاکستان کې د ټولو وګړو د حقونو تحفظ کیږي.
د بهرنیو چارو د دفتر ویاندې پخپله اعلامیه کې ویلي د نهم مئ د پېښو په اړه پاکستان کې دننه ټول ګامونه د ایین اؤ قانون له مخې اخستل کیږي.
په نهم مئ پاکستان کې د غبن په یوه مقدمه کې د پخواني وزیراعظم عمران له نیول کیدو وروسته د هغه د ګوند پاکستان تحریک انصاف پلویانو قهرجن احتجاجونه کړي وؤ اؤ د دغو احتجاجونو په مهال پوځي تاسیساتو اؤ دولتي ودانیو ته اورونه لګول شوي وؤ.
له دغو پېښو وروسته پاکستان کې د تحریک انصاف ګوند ګڼ شمیر فعالین د پولیسو لخوا نیول شوي اؤ پوځ اعلان کړی چې د اړي ګړي پېښو کې د ککړو کسانو پرضد به پوځي محکمو کې مقدمې چلوي.
د انساني حقونو نړیوالو تنظیمونو په پاکستان کې په پوځي عدالتونو کې د ملکي کسانو په ضد د مقدمو مخالفت کړی دی.
په 18م مئ د امریکایي کانګریس تر 60ؤ زیاتو غړو خارجه وزیر انتوني بلنکن ته یو لیک استولی ؤ اؤ د هغه څخه یې غوښتنه کړې وه چې پاکستان کې د بشري حقونو د وضعیت ښه کولو په موخه باید د پاکستان په حکومت فشار واچوي.
دغو امریکایي قانون سازانو په خارجه وزیر بلنکن ټینګار کړی ؤ چې پاکستان کې د جمهوریت اؤ انساني حقونو د ودې اؤ تحفظ معامله باید پاکستاني چارواکو سره راپورته کړي.
د زیارت په ورځ دپاکستان د بهرنیو چارو ددفتر ویاندې پخپل یو بیان کې ویلي پاکستان د امریکایي کانګریس د غړو د لیک سره انفاق نه کوي .
د بهرنیو چارو د دفتر ویاندې زهره بلوڅ ویلي د پاکستان د ملي امنیت کمیټې د نهم مئ د پېښو په اړوند سپیناوی کړی دی اؤ پاکستان د خپلو ټولو وګړو حقونو اؤ د تاسیساتو اؤ ودانیو د تحفظ په اړوند پخپلې اییني ذمه واریو ولاړ دی.
ویاندې ویلي" اییني ضمانتونو اؤ بنیادي ازادیو ته زمونږ د عدلیې تحفظ ترلاسه دی".
دا په داسې حال کې ده چې پخوانی وزیراعظم عمران خان دعوه کوي د نهم مئ دپېښو نه وروسته دهغه د ګوند تر 10 زرو زیات فعالین نیول شوي اؤ په هغوي نه یوازې تشدد شوی بلکې د کورنیو غړي یې هم ځورول شوي دي.
عمران خان د پنجشنبې- زیارت په ورځ د پوځي عدالتونو ضد سپریم کورټ ته خواست وکړو او ويې وېل سپریم کورټ دې پوځي عدالتونه غیر اييني وبلي.
