جنرال منیر: د نهم مئ د پېښو ذمه واران به نه هېر کړل شي اؤ نه به وبخښل شي
د پاکستان د پوځ سرلښکر جنرال عاصم منیر ویلي په نهم مئ چې پاکستان کې کومې ناوړه پېښې رامنځته شوې هغه د افسوس اؤ غندنې وړ دي اؤ قام به د دې پېښو ذمه واران نه هیر کړي اؤ نه به یې وبخښي.
د زیارت/پنجشنبې په ورځ پولیس لاین اسلام اباد کې پولیس افسرانو اؤ ځوانانو ته پخپله وینا کې جنرال منیر ویلي، چا چي په نهم مئ د شهیدانو د یادګارونو سپکاوی کړی د ټول قام زړونه یې دردولي دي اؤ قام به هیڅکله دوی ونه بخښي اؤ نه به داسي عملونه وزغمي.
په نهم مئ پاکستان کې د پخواني وزیراعظم عمران خان د نیول کیدو پرضد شوؤ احتجاجونو کې د اړي ګړي د رامنځته شوؤ پېښو پړه حکومت په تحریک انصاف ګوند ور اړوي خو د دغه ګوند مشر عمران خان بیا تور لګوي چې په دغه ورځ ایجنسیو خپل کسان د هغه د پلویانو منځ ته ورپریښي وؤ اؤ دا اړی کړی یې کړی دی.
عمران خان پرله پسې په پوځي ودانیو د شوؤ بریدونو د بې پلوه پلټنو غوښتنې کوي خو پوځ اعلان کړی دی چې دغو پېښو کې د لاس لرونکو په ضد به پوځي محکمو کې مقدمې چلوي.
د آی ایس پي ار د بیان له مخې پوځي مشر پخپله وینا کې ویلي، د پاکستان پوځ، پولیس اؤ قانون نافذوونکې ادارې د ریاست علامتونه اؤ د او دفولادو د دیوال په څېر دي چې د ملک اؤ قام لپاره له یوې قربانۍ هم ډډه نه کوي.
جنرال عاصم منیر وویل ولس اؤ پوځ د شهیدانو د کورنیو سره ولاړ دی اؤ ولاړ به وي اؤ هیڅوک د هغوئ قربانۍ ضایع کولی نه شي.
دا په داسې حال کې ده چې پرون د زیارت/پنجشنبې په ورځ پاکستان کې د پوځ اؤ پولیسو شهیدانو ته د درناوي وړاندې کولو ورځ نمانځل شوې اؤ ګرد هیواد کې په دې اړوند غونډې اؤ لاریونونه راجوړ شوي وؤ.
په نهم مئ د عمران خان د ګرفتارۍ خلاف دشوؤ قهرجنو مظاهرو په مهال لاهور کې د کور کمانډر او په پېښور کې د رېډیو سټېشن ودانیو ته اورونه اچول شوي وو. د دې نه علاوه د پاکستان په نورو برخو کې هم پوځي اثاثې په نخښه کړل شوې وې.
اېسوسي اېټېډ پرېس خبري اداره وایي د مظاهرو نه وروسته د پاکستان امنیتي ادارو د عمران خان د پلویانو خلاف ګامونه پورته کړي او د خان د 5000نه زیات پلویان يې نیولي دي خو عمران خان بیا دعوه کوي چې دهغه دنیول شوؤ پلویانو شمیره تر10 زرو لوړه ده
