لویو امریکايي ښارونو کې لاریونونه او ګرځبندیز

د انځور حقوق Reuters

د امریکا په ځینو لویو ښارونو کې د پولیسو او لاریونیانو ترمنځ د اخ و ډب کابولو کولو د هڅې په توګه ګرځبندیز لګول شوی. دا لاریونونه په مینیپولیس ښار کې د یوه افریقا الاصله وګړي تر وژل کېدا وروسته پیل شول.

نن په ځینو امریکايي ښارونو کې د لاریونونو پنځمه شپه ده، چې د اړدوړ ضد پولیسو یې پرضد اوښلن غاز او ربړي مرمۍ هم کارولې دي.

لاریونیانو د پولیسو ځینې ګاډي وسوځول او په نیویارک او فلادلفیا او واشنګټن کې هم د اخ و ډب پېښې رامنځ ته شوې دي.

د امریکا ولسمشر ډونلډ ټرمپ ویلي، که سیمه ییز چارواکي د لاریونیانو په کابو کولو کې پاتې راغلل، پوځ دې مداخله وکړي.

ټرمپ د تاوتریخجن اخ و ډب ملامتیا پر لوټمارو او اړ و دوړ جوړوونکو اچولې ده.

• ۱۱ وژنې چې د امریکا پولیسو ظلمونو خلاف یې احتجاجونه راوپارول
• د تورپوستي د وژلو له امله لاریونیان د امریکا بېلابېلو ښارونو کې له پولیسو سره کېوتل

د مینیسوټا ایالت والي ټیم والټز ویلي، لاریونونه "په هېڅ ډول" د ۴۶ کلن جورج فلویډ د وژنې پر پېښې پورې تړاو نه لري.

دی وايي، په دې ایالت کې یې په بشپړ ډول د اړدوړ کابو کولو لپاره چمتووالی نیولی دی.

په مینیپولیس کې تورپوستی پولیس په زندۍ کولو وژل شوی، هغه چې پولیسو نیولی و.

په دې وسیله کې د غږ اوريدل او ویډیو لیدنه شونې نه ده.

په یوه وېډيويي کلیپ کې ښکاري چې ۴۴ کلن پولیس ډیریک شوفین د فلویډ مرۍ څو دقیقې زندۍ کړې، خو هغه چیغې ورته وهي چې "سا نشي اخیستی"، دا پېښه د ۴ پولیسو د دندو ځنډولو لامل شوه.

یاده وېډیو پر انټرنېټ ډېره زیاته شریکه شوه، خو لاریونیانو یوځل بیا پر امریکايي پولیسو خپله غوسه سړه کړه.

له دغو پولیسو پر یوه یې د قتل تور لګول شوی او نیول شوی او درې نور له دندو لیرې شوي پولیس ازاد دي.

ولسمشر ټرمپ ویلي، د ښاغلي فلویډ له کورنۍ سره یې خبرې کړي دي. هغه مخکې ویلي وو چې "عدالت به پلی شي."

د فلویډ کورنۍ د پولیس د نیول کېدو هرکلی کړی، خو وايي اصلي تور باید پر همدغه کس ولګول شوي او نور پولیس هم باید ونیول شي.

هر کال تر زرو ډېر کسان د امریکايي پولیسو په لاس وژل کېږي او ډېری قرباني کېدونکي کسان تورپوستي دي.