کورونا ویروس: "کابل کې له ګرځبندیز سرغړوونکي جریمه او بندي کیږي"
د انځور حقوق
Getty Images
په افغانستان او بیا ځانګړې توګه پلازمېنه کابل کې د کورونا د مثبتو پېښو په ډېرېدو سره چارواکو سر له نن نه په کابل کې ګرځبندیز لا پسې سخت کړی دی.
د کابل والي محمد یعقوب حیدري بي بي سي ته وویل، چې د هغو کسانو په ناغه کولو او آن بندي کولو به لاس پورې شي، چې بې اړتیا په ښار کې ګرځي.
نوموړی وايي، که څوک ګرځبندیز مراعت نه کړي د جزا کوډ د ۸۰۷مې مادې په بنسټ به تر ۱۸ زره افغانیو نقدي جریمه کیږي. دده په وینا که سرغړونه جدي وي، بندي کېدای هم شي.
د کابل والي وایي: "یو شمېر ځوانان او نور هېوادوال ډېره بې پروايي کوي او زموږ خبرې ورته ټوکې ښکاري. ځي راځي او محفلونه جوړوي. ان ځینو ځایونو کې خپلو کورونو کې د ودونو محفلونه جوړوي. دا خو عادي خبرې یا ټوکې نه دي."
دی وايي، له داسې خلکو سره به جدي چلند کیږي. د نوموړي په وینا د افغانستان د جزا کوډ ۸۰۷مه ماده حکم کوي: "هغه شخص چې په اوبو، خاوره، هوا یا ځمکه کې مضره یا ککړونکي توکي په هغه اندازه چې د هغوی فزیکي، کیمیاوي، یا بیولوژیکي کیفیت په داسې توګه وي چې انسان یا نورو ژوندیو موجوداتو، بوټو یا ودانیو ته مضر وي، خپاره یا ګډ کړي، د ژوند چاپېریالیز جرم مرتکب ګڼل کیږي چې په متوسط حبس محکومیږي."
- کورونا وېروس: د نړۍ وروستی حال
- کورونا ويروس: څنګه ځان خوندي ساتلی شو
- په کورونا د اخته کسانو شمېر له یو میلیون ډېر شو
د جزا په کوډ کې متوسط حبس هغه ته وايي چې کس له یوه کال نه تر پنځه کلونو پورې بندي شي. د کابل والي وايي، د خلکو سرغړونې ته په کتو به د اړتیا په صورت کې پرې د همدې مادې حکم پلی کوي.
د کابل والي وایي، ټکسي چلوونکو ته یې سپارښتنه کړې چې یوازې درې کسان په ګاډي کې ولېږدوي. خو زیاتوي که له دې سرغړونه وشي، ډرېوران به جریمه کیږي، لایسنس به ترې اخیستل کیږي او موټر به یې هم درول کیږي.
د ښاغلي حیدري په وینا ټاکل شوې چې له دې وروسته هر اونۍ لږ تر لږه یو وار د کابل ښار او ولسوالیو واټونه او نور ځایونه چې د ویروس پاتې کېدو ویره پکې شته، د اطفایې په مټ د مکروب ضد مایع باندې ومینځل شي.
په پلازمېنه کې د محدودیتونو جدي کولو پریکړه له هغې وروسته راځي چې په کابل کې د کورونا مثبتې پېښې په ورستیو کې لا پسې زیاتې شوې دي.
تېره ورځ د عامي روغتیا وزارت وویل، په تېرو ۲۴ ساعتونو کې په دغه هېواد کې د کورونا وېروس ۲۵ تازه پېښې ور سره ثتبې شوې دي.
د عامې روغتيا وزارت وايي، د کابل، ننګرهار او هرات په لابراتوارونو کې د کورونا وېروس په اړه ټول ۲۲۸۸ سمپلونه معاینه شوي چې له ډلې یې ۱۹۶۰ منفي او ۲۹۹ یې مثبت دي.
ددې وزارت سلاکار او ویاند وحیدالله مایار پرون یوې خبري غونډه کې وویل، پر کورونا د اخته کسانو له ډلې ۱۲ بېرته رغېدلي او ۷ کسان یې له امله مړه شوي دي:
"د ۲۴ساعته په تېریدو سره د عامې روغتیا وزارت ۲۵ مثبتې پېښې کړي دي چې له ډلې یې په کابل کې ۱۱، په هرات کې ۵، سمنګان کې ۲ او همدارنګه په بلخ، غزني، فاریاب، لوګر، نیمروز، کندز او غور ولایتونو کې یوه یوه مثبته پېښه ثبت شوې."
