د لوی، مهربان او بخښونکي خدای په نامه

په ډنمارک کې د پښتو شعر اونۍ

وږمه توتاخېل 24.03.2008 11:50

د مارچ د میاشتې په ۲۰ نېټه په ډنمارک کې د خپلواکۍ د فرهنګي مرکز په نوښت د یوې کلتوري شپې په ترڅ کې د افغانستان د اوسني شعر پر څرنګوالي او په ځانګړې توګه د غوره شاعر عبدالمالک بېکسیار پر شعر او شعریت خبرې وشوې . په پیل کې د خپلواکۍ د فرهنګي مرکز په استازیتوب لیکوال او ژورنالیست ښاغلي یوسف هېواددوست او د خپلواکۍ د فرهنګي خبرونې مسُول مدیر آغلې فیضیه هوسا راغلو مېلمنو ته ښه راغلاست او هرکلی ووایه .د خبرو په دوام ښاغلي هېواددوست په بهر کې د پښتو هنر او ادب او په ځانګړې توګه په ډنمارک کې د پښتو ادب پر څرنګوالي او څومره والي خبرې وکړي او ښاغلی عبدالمالک بېکسیار یې ددغه شان هڅو یوه غوره بېلګه وبلله .ورپسې له کابل نه راغلي مېلمه ، د کابل پوهنتون استاد او د افغانستان د جمهوري ریاست د ملي امنیت د ادارې د فرهنګي چارو مسًول ښاغلي محمد اسماعیل یون د خپلو څرکندونو په ترڅ کې لومړی په افغانستان کې دننه په ټولیزه توګه د اوضاع او له هغې جملې د افغاني هنر او ادبیاتو د ودې او روزنې پر څرنګوالي خبرې وکړي او خوښي یې وښوده چې دلته په ډنمارک دافغاني ادب استازي دومره اغېزمن ګامونه اخیستي چې د خپل پلرني ټاټوبي د تاریخ او فرهنګ د غوړولو او څرګندولو لپاره یې ښې روښانه ډیوې بلې کړي . ښاغلي اسماعیل یون له هغې ډلې د شاعر او ادیب مالک بېکسیار نوم د یوې ښې بېلګې په توګه یاد کړ . زموږ خبریال زیاتوي چې وروسته بیا د لندن د یوشمېر فرهنګیانو استازي ښاغلي نجیب احمدزي ، د بلجیم له هېواد څخه ښاغلي حاجي محمد باوري اود هالیند له هېواد څخه ښاغلي حسن شور دغه راز د جرمني له هېواد د اروپایي هېوادو د افغانی کلتوري ټولنو د ګډې جرګه ګۍ په استازیتوب ښاغلي عاشق الله غریب ، له ناروې څخه ښاغلي زخمي ، ډنمارک مېشت افغاني شاعر ښاغلي رحمان ګل توتاخېل او یو شمېر نورو د خپلو ټولنو نېکې هیلې او د شاباسیو مراتب یو په بل پسې بیان کړل .په خبر کې راغلي چې د ډنمارک د یولند له لویې وچې څخه راغلي میلمه ښاغلي عرب شاه چمتو ،او د فرهنګي ټولنې لخوا ښاغلو انجینیر یارګل امیري او ښاغلي فرهاد سادات هم ددغه شان اغېزمنې ناستې پر اهمیت تاکید وکړ او ښاغلی بېکسیا ر یې د پښتو شعر غوره استازی وباله . ددغه مجلس د خبرو لړۍ د سهار تر پنځو بجو دوام وکړ چې د ښاغلي هېواددوست له خوا د بېکسیار د شعرونو پر لوستو پای ته ورسېده .زموږ خبریال دا هم لیکي چې وروسته بیا غوره فرهنګي شخصیت ښاغلی محمد اسماعیل یون مجلس ته په خطاب کې وویل چې افغانستان د پرمختګ یو نوي پړاو ته ورداخل شوی ، دغه پرمختګ له خپلو ټولو ستونزو سره سره د رښتینو افغانانو د یو ستر مکلفیت په توګه بې له خنډه روان دی او بې له شکه په بهر کې د بادرده او کارپوهو افغانانو ملاتړ او مرستو ته اړتیا لري .د ښاغلي یون د رپوټ او وینا په پای کې ناستو کسانو یو په بل پسې خپلې پوښتنې مطرح کړې چې په هر ه برخه کې به د ښاغلي یون لخوا لازم او قناعت بښونکي ځوابونه ورکول کېدل .ښاغلي یون په ځانګړې توګه د خپلواکۍ د فرهنګي مرکز له کارونو او هڅوڅخه ستاینه وکړه او دا یې د هېواددوستۍ یوه غوره بېلګه وګڼله ، او هیله یې څرګنده کړه چې ددغه مرکز چارې تر دې هم لا ښې او پیاوړې شي . په مقابل کې ددغه مرکز د تخنیکي چارو مسًول او د کوپنهاګن د پوهنتون محصل ځوان سباوون هېواددوست له راغلو مېلمنو او په ځانګړې توګه د افغانستان د نامتو فرهنګي شخصیت ښاغلي یون له نېکو هیلو او پېرزوینو مننه وکړه او د مرکز لخوا برابره شوې تحفه یې ښاغلي یون ته ډالۍ کړه .خبر دا هم زیاتوي چې د تېرو ورځو په دوام راغلي میلمانه د ښاغلی بېکسیار په کور کې له یو شمېر هغو نورو میلمنو سره یوځای شول چې د ډنمارک له بېلا بېلو سیمو حخه په همدغه مناسبت راغلی و .دلته په لومړی سر کې فرهنګي شخصیت ښاغلی ممتاز ارمان مېلمنو ته ښه راغلاست ووایه او د خبرو په ترڅ کې د بېکسیار د شعر پر بېلا بېلو اړخونو څرګندونې وشوي . په دغه غونډه کې د بېکسیار د شعرونو دوه ټولګې پر حاضرینو ووېشل شوې . وروسته بیا میلمنو په هغه غونډه کې چې د مارچ پر ۲۱د ډنمارک د لیکوالو او شاعرانو د ټولنې لخوا د کوپنهاګن د ښار په یوه صالون کې د بېکسیار د شعریت په اړه جوړه شوې وه برخه واخیسته .غونډه د ښاغلي ( یولي لولی لند) په وینا راپیل شوه .نوموړي وویل موږ دافغانستان له ادب په ځانګړي توګه له پښتو ادب سره ښاغلي بېکسیار معرفي کړو .بېکسیار د پښتو شعر نه فنا کېدونکی ستوری دی او موږ خوښ یو چې د افغانستان د ادبیاتو دغه استازی له ځان سره لرو . وروسته بیا ښاغلي بېکسیار خپل یو شمېر شعرونه ولوستل چې هر شعر یې د ښاغلي ( یولي لولي لند ) له خوا په ډنمارکي لوستل کېدل .هغو ډنمارکیانو ته چې د بېکسیار د شعر اورېدو ته راټول شوي و د پښتو اشعارو ډنمارکي ژباړې خوندورې او بې جوړې وې . د غونډې په بله برخه کې له افغانستان نه راغلي مېلمه او غوره فرهنګي څېرې ښاغلي محمد اسماعیل یون د یوې لنډې وینا په ترڅ کې خوښې څرګنده کړه چې پښتو شعر د ډنمارک د ادبیاتو په لوی سیند کې خپله برخه موندلې او په دې لاره کې یې د بېکسیار هاند او هڅې وستایلې . نوموړي د خپلو خبرو په پای کې د افغانستان د ټولو فرهنګیانو نیکې هیلې او سلامونه د ډنمارک فرهنکي شخصیتونو ته و سیله شو او هیله یې څرګنده کړه چې د ډنمارک او افغانستان روانې فرهنګي اړیکې لاپسې پرمختګ وکړي .زموږ خبریال لیکي چې غونډه د خوږ ژبي پښتو سندربول ښاغلي بهرام په ښکلي کنسرت پای ته ورسېده . په غونډه کې د خپلواکۍ نوې ګڼه چۍ د ښاغلي بېکسیار شعر ته څانګړې شوې پر راغلو میلمنو ووېشل شوه