د لوی، مهربان او بخښونکي خدای په نامه

ای اختره

پوهنمل محمدوارث 02.08.2016 12:14

د ليکوال څو نورې لیکنې

ټول

ای اختره زمونږ ډيره غريبي ده
له هر وخته نن مو ډيره ناچاري ده

ګوره رانشې بچيان به مو ځوريږي
زمونږ خپله ورځ تر بلې بدتري ده

کوچنۍ لور زما نکرېزې له ما غواړي
لاس به چاته غزومه بې وسي ده

څوک د چا د بېوسۍ نه څه خبر دي
په فکرونو کې د هر چا ځان ځاني ده

د بنګلو لاندې کوډۍ کې مونږ اوسيږو
برابره زمونږ کله دا سيالي ده

ما تڼۍ څيرې ګرېوان ته پيدا نه کړې
وس مو نشته دلته څومره قيمتي ده

خوشحالي زمونږ په ستوني کې سلګۍ شي
ځکه دلته بيا د اوښکو ارزاني ده

هلته ښار د رڼاګانو کې ميلې دي
دلته ټولې ډيوې مړې دي خاموشي ده

ته به کله خوشحالي ځان سره راوړې
زمونږ چم کې لا تراوسه پرېشاني ده

که راخې ن وچې ښکالو دې څوک وانه وري
وارث وائي چوپه خوله دې بهتري ده