د لوی، مهربان او بخښونکي خدای په نامه

پاکستان ؛ افغانستان ته د ترهګرو د ليږد په لټه کې

خوشحال آصفي 19.04.2016 21:23

راپورونه وايي پاکستان پر ډيورنډ کرښه د ځواکونو شمېر زیاتوي. د پاکستان د دفاع وزیر، خواجه اصف، ویلي، پاکستان به په قبايلي سيمو او بلوچستان ایالت کې له افغانستان سره پر پوله د سرحدي ځواک یا ملېشه ځواکونو شمېر زیات کړي او د پولې څارنه به نوره ښه کړي، تر څو دده په خبره پر پوله د ترهګرو تګ راتګ کم شي. خواجه آصف ويلي د ترهګرو د ځپلو لپاره پلان لري چې د ډيورنډ کرښې په څېرمه سيمو کې پراخ پوځي عمليات وکړي.
دا چې د پاکستان پوځ يو ځل بيا پر دې خبرې ټينګار کړى، چې د ډيورنډ کرغيړنې کرښې ته څېرمه سيمو کې به د وسله والو پرضد پوځي عمليات وکړي؛ راځئ پر يادې سيمې د پاکستاني پوځ تيرو عملياتو ته رڼا واچوو:
پاکستاني پوځيانو له دې وړاندې هم څو ځلي د ډیورنډ کرښې څېرمه سيمو شمالي وزيرستان کې پوځي عمليات ترسره کړي دي او لوړ پوړو چارواکو يي د عملياتو د پيلولو پر مهال ويلي وو، چې د وزيرستان په پوځي عملياتو کې د وسله والو طالبانو او نورو ترمنځ توپير نه کوي. د ښه او بد ترهګر توپیر به نه کوي او افغان او پاکستاني طالبان دواړه به ځپي؛ خو ډير ژر په ډاګه شوه چې د شمالي وزيرستان پوځي عمليات يوازي د پاکستاني طالبانو د ځپلو او افغانستان ته د شړلو په موخه ترسره شول چې هدف يي دلته په افغانستان کې د افغان حکومت پر ضد د وسله والو مخالفينو د ليکو پياوړي کول و. په هاغه مهال په پاکستان کې د  حقاني شبکې، لشکر طيبه او هغه وسله والو چې په افغانستان کې په جګړه اخته و؛ پناه ځايونه، روزنځايونه او استوګنځايونه ټول خوندي پاتې شول او په عملياتو کې یوازې هاغه وسله وال په نښه شول چې خطر يي پاکستان ته متوجه و. هاغه مهال په سيمه کې مېشت د حقاني شبکې وسله والو ته د پاکستان پوځ او آی ايس آی د پوځي عملياتو تر پيلېدا مخکې له وزيرستانه د وتلو لار ورکړې وه او په اسلام اباد، کراچۍ، لاهور او نورو خوندي ځايونو ته يي انتقال کړي و.
که د ځانمرګو بريدګرو د چمتو کولو لړۍ وڅېړل شي نو په ډاګه کيږي چې له عقيدتي جګړې څخه سرچينه اخلي او وسله والو ته د عقيدتي جګړې روحيه د پاکستان د تش په نوم اسلامي مدرسو کې ورکول کيږي او دغه افراطي مدرسې د اسلام اباد په شمول د پاکستان په بيلابیلو ښارونو کې شتون لري. دلته اوس پوښته دا ده ، په داسې حال کې چې ترهګر له اسلام اباده ملاتړ ولري نو دا بيا کوم منطق مني چې په شمالي وزيرستان کې په دغو اوسنيو عملياتو کې دې افغان ضد ترهګر وځپل شي؟
په کوم ثبوت ويلی شو چې د پاکستاني پوځ په نظر او ستراتيژۍ کې دې ۱۸۰ درجې تغير راغلی وي او ګويا دا ځل به په رښتونې توګه ترهګر؛ افغانستان ته د ليږدولو پر ځای وځپي؟
خبره روښانه ده چې پاکستان غواړي يو ځل بيا د ډيورنډ کرښې څېرمه سيمو کې د ترهګرو پر ضد د عملياتو په نامه؛ وسله وال طالبان له کرښې دې غاړې افغانستان ته د پسرلنۍ جګړې لپاره راواستوي او دلته د وسله والو مخالفانو ليکې پياوړې کړي. پاکستان په دغو عملياتو سره غواړي چې دلته په افغانستان کې د افغان حکومت په مقابل کې د دښمن پسرلنۍ جګړه توده او يو ځل بيا د بې ګناه افغانانو وينه تويه کړي. ځکه که وګورو له يو طرفه افغان دولت د سولې په نوم د وخت ضايع کوونکي مذاکراتو کې بوخت دی او بل لور ته وسله والو مخالفانو هم د «عمري» په نوم د پسرلنيو عملياتو اعلان کړی دی چې د ډيورنډ کرښې څېرمه سيمو کې د پاکستاني پوځ له لوري عمليات هم د همدې هدف لپاره ترسره کيږي چې دلته د وسله والو «عمري» عملياتو ته قوت وبښي.
پاکستان تل د افغانستان په بربادۍ او جنګ کې خپلې ګټې لټولې او اوس هم د پاکستان په نيت شک شتون لري چې يو ځل بيا به د ډيورنډ کرښې ته څېرمه سيمو کې د پوځي عملياتو په پلمه؛ ترهګر له پاکستانه افغانستان ته وليږدوي او روان کال به د تير هغې په نسبت ډير خونړی کړي. په ټوله کې ويلای شو چې د ډيورنډ کرښې ته څېرمه سيمو کې د پاکستاني پوځيانو هر رنګه پوځي تحرکات د ټولو نړيوالو قوانينو خلاف او د عملياتو موخه يي د په افغانستان کې د جګړې ډګر تود ساتل دي او بس.