امرالله صالح له « برنامې څخه شبنامې ته »!

د ۱۳۹۳ کال د غبرګولي په لومړۍ ورځ، د ټاکنو د دوهم پړاو د کمپاین په پیل کې، د تحول او تداوم ټیم مشر اشرف غني پخپله وینا کې وویل: ده سره د شبنامې پرځای برنامه، د اخطارپرځای سوله، د ګواښلو پرځای یوبل منل، ځای لري.
د برنامې پرځای د شبنامو یادونه، په حقیقت کې ډاکټر صیب اشرف غني هغه شپې پاڼو ته ګوته نیسي چې په پنجشیر کې د تحول او تداوم ټیم په مخالفت خپرې شوې وې. په دې اړه د افغان ځواک خبرخونه وايي:
« شبنامې او په دې اړه ډيرې خبرې وروسته تر هغه را پورته شوې، چې تر دې مخکې د عبدالله ټاکنيز ټيم په پنجشير کې له دې پاڼو کار اخیستی و او خلک يي ښاغلي غني ته د رايي نه ورکړې ته هڅولې وو.
په لومړي سر کې ويل کيدل چې دا شپې پاڼې ( شبنامې ) به جوړې شوي او يوازې به په ټولنيزو پاڼو کې وي، خو روسته د ښاغلی عبدالله ټاکنيزټيم ومنله چې دا کار د دوی ځينو پلويانو کړی او دوی يي مني چې يادې پاڼې د دوی دي.»
البته دا باید هېره نکړو چې دعبدالله ټیم ددې شپې پاڼو په خپراوي، په اسانۍ او ساده توګه اعتراف ونه کړ، بلکې دا اعتراف د تحول او تداوم ټیم په پرلپسې ټينګار او د کره لاسوندونو په مټ، ترسره شو!
ددې لیکنې سرلیک له دې پېښې سره تړاو لري، اوس اصلې خبرې ته راګرځم.
په ټاکنو کې هر ټیم یا نوماند ته د رایې ورکړه، د هر وګړي مدني حق او له نیوکې خوندي دی. دلته نیوکه، د امرالله صالح شخصي حق ته نه ده په نښه شوې، بلکې دده پشان هغه څوک یادیږي چې د روڼ اندۍ لاپې وهي او غواړي ټولنې ته ځان د مخکښ او مختازي پتوګه وروپيژني، خو مخکې له دې چې ولس سره يي د ژمنلیک رنګ وچ شي او یايي د ژمنو اوخبرو غږ د اوریدونکو له غوږو ووځي، خپلو ژمنو ته شا اړوي او د خپلې رسواۍ تشت پخپله له بامه راغورځوي!
په یو تازه خبر کې لولو « د استخباراتو پخوانی رييس امر الله صالح له عبدالله عبدالله سره ملګري شو. ګومان نه کېږي چې نوموړی په ولس کې موقف ولري خو امرالله صالح ته د یوه روشنفکر او تجربه کار شخصیت په سترګه کتل کېږي چې په پنجشېر کې زیات ملګري لري. تاند»
خو په اصطلاح دغه روشنفکر او تجربه کار! امرالله صالح لږ مهال وړاندې په یوه غونډه کې د ډاکټر اشرف غني او د هغه د تګلارو د ستایلو په اړه ویلې وو« ما در دوران طالب ها، در دوران جهاد صفت های باخود داشتیم. صلحشور هستیم، خواهر ما شعر خوانده، دریايی طوفاني هستیم، از دور دشمن را میزنیم. ولی در بین افغانها کس دیګریکه یک دیدګا راترسیم کنند که ما نفت داریم، سرمایه داریم، تاریخ داریم و این احساسات و این روز بخاطر طوفانی، در عین زمان میتواند یک روزی بخاطر سرسبزی و ابادي هم باشد، اسفاده کند، این نیاز به یک ادبیات نو داشت.
این ادبیات را در افغانستان ډاکټر صیب اشرف غنی احمدزی معرفی کرده.»
دغه وینا په یوټیوب کې په اسانۍ د پیداکېدو وړده.
اوس پوښتنه دا ده چې امرالله صالح څنګه په روښانه ورځ اوښ په بډه وهي او د اشرف غني له روښانې برنامې څخه چې خپله يي په تفسیر کې افغانانو ته ژبه لکه میږي خورک مرغه، (۱) اوږده کړې وه، په یوه ګام او توره شپه، په پنجشیر کې د اشرف غني پر ضد د خپرې شوې شبنامې خپروونکو ته پنا وړي؟
همدارنګه د ملي امنیت دې پخواني مشر د « حرکت جدید به سوی جهاد اکبر یعنی نجات افغانستان از چنګال ایرانیها و پاکستانی ها » په یوه تبصره کې چې څه مهال مخکې ما په خپله یوه لیکنه کې ترې یادونه هم کړې وه، ویلي وو:« حمایت من از داکتر اشرف غنی بخاطری است که من در وجودش تمام ارزشها را میبینم. اګرمیخواهید یک افغانستان مستقل ازاد و بدون تعصبات قومی، لسانی داشته باشید با ما یکجا شوید و اینرا هم به یاد داشته باشید که تمام جهان خوشبین برای برنده شدن داکتر اشرف غنی است. تمام کمک ها جلب میشود بخاطریکه یک تیم پاک و با عتماد از جامعه بین المللی را با خود داریم و برنده استیم. لعنت به کسانی کی دامن به تعصب میزنند. با احترام امرلله صالح. د انټرنیټ له زیرمو څخه»
دلته بیا هم امرالله صالح غواړي افغانانو ته دوکه ورکړي او هغه ټیم سره یوځای کیږي چې د خپل مخکیني بیان خلاف د قومي او ژبنیو تعصباتو پر بنسټ رامنځته شوی!
که دده په وینا « یک افغانستان مستقل ازاد و بدون تعصبات قومی، لسانی» د اشرف غني پر محور او تګلار جوړېدای شي او « که تمام جهان خوشبین برای برنده شدن داکتر اشرف غنی است. تمام کمک ها جلب میشود بخاطریکه یک تیم پاک و با عتماد از جامعه بین المللی را با خود داریم»
نو بیا څنګه او ولې د عبدالله ټيم سره د خپلو ویناوو پرخلاف، یوځای کیږي؟
دلته ډېرې نورې پوښتنې هم رامنځته کېدای شي:
ــ ایا امرالله صالح د اشرف غني په اړه دا څرګندونې په تصادفي ډول او که د پوهاوي او باور له مخې کړي؟
ــ ایا د اشرف غني په اړه مثبتې څرګندونې او په عمل کې د عبدالله ملاتړ او لوری نیول، کومه استخباراتي لوبه نه ده؟
ــ ایا د داسې کسانو په ورتګ سره د عبدالله ټیم د افغانانو په وړاندې له پخوا زیاته خپله وړتیا او ژمنتیا له لاسه نه ورکوي؟
که ددې پوښتنو ځواب هرڅه وي، یوه خبره بیخي روښانه ده چې د عبدالله ټیم د هیواد لپاره نه کړنلار لري او نه مخ او نه د افغانستان ملي ګټو ته د ژمنو کسانو ټیم دی!
د عبدالله ټیم د هغو کسانو ټولګه ده چې د تګلارې پرځای په سبوتاژ، افغانانو ته په رڼا ورځ د خپلو موخو د بیان پرځای په شپې پاڼو، د سولې پرځای د ګواښونو او د افغانانو د یووالي او پيوستون پرځای د بېلښت او نفاق خبرې کوي!
افغانان باید دغه درواغجن، ژبماتي او شاتګپال ټیم ته رایه ورنکړي او د خپلو رایو په مټ د هغې توطيي مخه ونیسی چې ددې ټیم په بریا کې، افغانستان او افغانانو ته متوجه ده!
يادونه:
( ۱ ) میږي خورک داسې یو مرغه دی چې د ونو او بوټو په پټه برخه کې ځای په ځای کیږي او خپله ژبه چې نسبتآ اوږده ده راباسي، میږتانه او نور حشرات لومړي پرخپله غځولې ژبه راټولوي او بیا يي په یوار سره له ستوني تیروي.
پای