د لوی، مهربان او بخښونکي خدای په نامه

شعر

م.ر.یادګاری 25.04.2012 10:37

د ليکوال څو نورې لیکنې

ټول

راشي د میلمه په نوم بادار جوړ شي
مخکی شي زمونږ سپه سالار جوړ شي
سره دی او که تور او یا د سپین په نوم
خاورې د افغان ته خریدار جوړ شي
وتړي عهدونه چی دوستان به یو
راشي زمونږ دوست څخه غدار جوړ شي
لنډ به کړو لاسونه د پردو خلکو
وایی او پخپله بیا اغیار جوړ شي
وایی چی امنیت او سوکالی راوړو
سم یی د راتګ سره ناتار جوړشي
غم د غریبۍ به ورکوو مونږه
وګورئ پخپله بیا مالدار جوړ شي
غلا وکړی د شپی او بیرته لاړ شی نور
ورځ کی زمونږ سر ته چوکیدار جوړ شي
وژني په کوم زور زمونږ بچي چې دوي
ژر دی چی وطن نه مو مزار جوړ شي
یاد ساتې د روس او د انګریز په شان
خاوره د افغان به درته دار جوړ شي
دعا کړي یادګاری چی مخ تورن به شئ
بیا به هم تاریخ زمونږ یادګار جوړ شي

سرپاڼه